Denzel, Xechell, Bjorn i Terren a topa Bollebof, Keizer i Freddy Moreira


Resientemente Decoded, un plataforma internashonal di músika, ku base na Kòrsou a organisá un enkuentro informal, estilo di ‘Meet and Greet’ na unda ku hóbennan ku ta ‘upcoming’ den farándula lokal a risibí oportunidat di topa artistanan ku ya kaba tin un karera establesí. Tin ku remarká ku artistanan Bollebof i Keizer, komo tambe Freddy Moreira tabata entusiasmá ku e idea di por topa e hóbennan i mesora a konsedé nan e enkuentro. Durante di e enkuentro e artistanan a duna algun tep i tambe un impreshon di nan eksperensianan. Ta trata di grupo DXBT ku e karanan konosí di Denzel, Xechell, Bjorn, Terren. Kada un di e hóbennan aki tin un rais musikal i por a mira nan durante un presentashon di introdukshon durante di Skempi Music Awards aña pasá. DXBT ta kontené e promé lèter di e nòmber di kada integrante. Nan ta e artistanan di mas hóben den e portofolio di Decoded. Ku e mira pa ofresé hubentut algu positivo, e yònkumannan di DXBT ta pendiente pa lansa nan promé kansion na radio. Ta gradisí Saint Tropez Ocean Club, GA, MAC Studios, Greyan Films i Help'R pa nan kontribushon durante e Meet & Greet.

E podio di Decoded ta ofresé un plataforma di maneho, desaroyo, kolaborashon, produkshon i merkadeo na artistanan lokal. Interesante hasi menshon ku artistanan riba e plataforma ya kaba tin diferente video clips, algun surpasando 150,000 views. Ta ofresé artistanan, tantu esnan establesé i esnan ‘prinsipiante’ un oportunidat úniko di wòrdu promové riba diferente kanal di social media, billboards i mas. Ademas, Decoded ta ekipá ku studio di grabashon i produkshon tantu pa audio i video. E mas resiente video clip riba e plataforma di Decoded ta esun di Enmeris feat. Rich Kalash ku a keda lansa 3 dia pasá. Sigui Decoded via di nan YouTube Channel: Decoded Official òf nan página di Facebook.

#NEWS #CURACAO

Featured News
Recent News
Archive
Search By Tags