Stanley Clementina a dal duru ku “Basil’é...”

E talentoso kompositor i kantante Stanley Clementina ta ekspandé su horizonte musikal ku e romántiko Afro Beat titula KULPAMI NUMA, un kolaborashon ku artista Remses ‘MuisjeMuis’ Rafaela. E interpretashon ta papia di un relashon unda e hòmber ta haña tur e kulpa durante e desenlase. Den varios esena den e videoclip modelo Franceen Westmaas ta hungá e papel di un investigado ku ta interogá Stanley. KULPAMI NUMA ta sigui splika kon e hòmber tambe ta eksperensia doló durante e relashon ora e realisá ku e relashon no ta bai mas. Tambe impreshonante pa mira kon KULPAMI NUMA ta trese varios talento Kurasoleño biba na Hulanda huntu pa realisá e proyekto akí. Banda di e interpretashon vokal di Stanley i MuisjeMuis, e kantika a keda produsí pa Stanley i e talentoso Zurich Musiq, i e videoclip a keda dirigí pa Thareyck Martina i Cineterra. Debut Albùm Durante e simannan benidero, Stanley lo ta na Kòrsou pa un gira promoshonal, unda e lo graba diferente videoclip pa su debut albùm, kual e ta plania pa lansa e zomer akí.

Ku e produkshon, e ritmo popular di Afro Beat ta para sentral, i Stanley ta kolaborá ku talentoso estrea nan urbano manera Dopie, Dayo i Ori. KULPAMI NUMA ta e promé kantika fo’i e albùm akí. Pa Stanley ta importante pa internashonalisá Papiamentu, i p’esei e ke promové e albùm akí den eksterior. Durante diferente gira ku e kantante Kaboverdiano Nelson Freitas, Stanley a ser inspira kontinuá kanta den su lenga materna. Komo vokalista, Stanley a traha ku entre otro Rass Motivated, Frank McComb, Tamara Nivillac, Shirma Rouse, Glennis Grace, i tambe Ir Sais. Na komienso di 2015, Stanley a kuminsá profilá komo solista i a lansa kantika nan manera ‘Regresa a Mi’, i ‘Sweet Pain’, unda ela ilustra kon fo’i reto relashonal tòg por bini kresementu signifikante.

#NEWS #CURACAO

Featured News
Recent News
Archive
Search By Tags