Angelique Klooster su CD lo inspirábo pa no give-up

E kansionnan di e CD nobo di Angelique Klooster ta zonando ku hopi fervor na radioemisoranan lokal. ‘Den bo Man’ ta un di e gospelnan ku aktualmente mas ta zonando na radio. Miéntras e ta trahando duru pa bai Aruba pa promoshon di e cd, tambe ta planiando un konsierto pronto. Di akuerdo ku Angelique un di e metanan di e CD ta pa trèk mas tantu hóben ku ta posibel pa skucha e palabra di Dios atraves di su kansionnan. Angelique mes ta splika di a purba logra esaki dor di produsí un cd mas variá ku ta posibel, trahando ku hóbennan tambe i ku ritmo nan ku ta trèk e hóbennan. Hopi hende ta pidiendo un videoclip di e kansion, pues ta pendiente tambe pa graba esaki próksimamente.

Inspirashon? “Loke a inspirámi pa saka e cd aki ta ku hopi hende a aserká mi i puntra mi ki dia e next cd ta bin, dor ku hopi di e kantikanan di e promé cd a bendishoná nan. Einan mi a disidí pa mesora bai traha riba e produkshon aki. Loke mi ke logra ku e cd aki ta pa nos hende nan wòrdu enkurashá pa NO give up. Pone tur kos den Dios su man, no pèrdè speransa, keda konfi’é semper, i tur kos lo sali bon”.

Kansion faborito? “Eigenlijk mi tin mas ku un ku mi gusta. 'Dios ta yega na ora' (komponé pa Charcel LAk) ta un kansion ku mi ta kere ta toka tur hende, meskos ku e ta toka ami. Tin ora nos ta haña nos den situashon nan ku nos no ta komprondé e dikon i kuantu mas lo dura promé nos haña solushon, i e kansion aki ta pone mi ‘ontstress’ mesora pasobra mesora mi ta kòrda ku Dios ta bon semper i di un manera òf otro e lo saka mi for di e situashon”. Angelique ta splika ku ta kasi imposibel skohe un kansion so, “E di dos ku mi gusta ta ‘Den bo man’ (komponé pa Willy Rodrigues) kual tin un ritmo super, pero ei mes den e dushi ritmo ei e palabra nan ta hopi poderoso. E ta splika kon bo tin ku hinka tur bo problema nan, enemigu nan, preokupashonnan den Dios su man. Anto ku ora nos ta den man drechi di Dios, nos ta protehá, nos ta salbá”.

#LOCAL #INTERVIEW #GOSPEL

Featured News
Recent News
Archive
Search By Tags