Naomi Silvanie, "Dushi Feeling ta un totalidat di hopi kos ku mi ta gradesido p’e.”


Resientemente Naomi a lansa su single nobo, titulá Dushi Feeling. Ken no konosé Naomi Silvanie? Un timbre ku ta keda resoná, na unda ku e presentá. Durante di e último tempunan aki Naomi a bin ta traha duru riba un identidat artístiko ku ta ‘propio’ i lòs for di popularidat di su mayornan den género musikal gospel (Duo Gleva) i su ruman hòmber Levi Silvanie ku ya kaba ta eksperensiando un popularidat kresiente na Europa. Naomi ta konta ku e pensamentu tras di e kansion ‘Dushi Feeling’ ta un sentimentu di gratitut, “Ku un aktitut di gratitut bo ta kambia bo persepshon di bida i stòp di focus riba e kosnan ku ta trese bo abou i kuminsá pensa riba e kosnan ku bo ta gradesido p’e den bida i ku ta trese goso den bo kurason kual ta produsí un dushi feeling.”

E dushi feeling ta keda ekspresá na diferente manera. “Un ‘dushi feeling’ pa Naomi ta varia, e por ta un dushi plato di yambo, famia, beach life di Kòrsou, graba den studio, un dushi kombersashon, mira mi metanan personal wòrdu lográ den mi bida… E ta un lista di hopi kos ku mi ta gradesido p’e”.

Loke ku e ta desea pa fanatikonan sinti ora di skucha e kansion ta un dushi vibe, “hopefully ku nan tambe ta bira mas konsiente di e kosnan ku nan por ta gradesido p’e den nan bida ku ta trese un dushi feeling”. Próksimamente fanátikonan lo sigui skucha mas di Naomi, ya ku e ta pendiente pa produsí algun single mas den kolaborashon ku otro artistanan i agrupashonnan musikal. Kosnan ta pinta realmente interesante pa Naomi Silvanie. Por sigui Naomi riba su página di Facebook i Instagram.

#LOCAL #NEWRELEASE #INTERVIEW #CURACAO #TROPICALHOUSE

Related Posts

See All
Featured News
Recent News
Archive
Search By Tags