MRaizz lo sali for di su comfort zone i eksplorá e ‘dark side’


MRaizz no ta deskonosí den género musikal urban. Aktualmente su kolaborashon musikal ku Dibo D ta halando hopi atenshon. Raichel Martina, di 30 aña di edat, nase na Kòrsou ta un artista ku ta perseverá den e mundu di farándula lokal i su esfuersonan poko poko a bin ta duna resultado. MRaizz ta konosí pa produsí kolaborashonnan (Collabo) musikal hopi eksitoso, sinembargo ainda e ta buska un hit singular. Pero, definitivamente MRaizz ta un ehèmpel pa hopi; no ta deskurashá!

Segun e mes ta konta, su collabo mas eksitoso ta ‘Milionario’ featuring Dongo. “E collabo aki ta spesial paso despues di hopi grabashon i purba huntu, e kosnan a funshoná e feeling ta manera esun di e mekániko ku ta bringa ku e outo i porfin e’la start. ‘Pordon’ huntu ku Dongo i Dibo D (i Pordon Remix) tambe mi gusta hopi mes! Pa e próksimo tempu lo mi a sigui traha ku artista nan di kustumber. Pero awor mi ta mas di focus riba saka single mi só. Esei ta un meta p’ami, ainda mi no tabata tin un hit mi so riba un track dus esei ta mi focus awor aki”.

Su último single huntu ku Dibo D ta un masha spesial pa MRaizz ya ku e’la wòrdu skibí den un momentu hopi sentimental, “Ora mi a mand’e pa Dibo D ela feel’e mes ora! Mi a pensa riba Dibo D, pasobra e ta un di e artista nan ku ora nos traha huntu kosnan ta flow natural i mi ta haña esei sumamente importante na momentu di traha huntu.” Próksimamente, MRaizz tin metanan internashonal, “Mi tin dos deseo di presentá na Hulanda i kolaborá den un proyekto internashonal maske ta ku mi letra idea, dress òf djis yuda pusha pa un artista lokal yega internashonal”. Den su próksimo proyekto e lo Sali for di su comfort zone, i eksplorá e ‘dark side’.

#LOCAL #NEWS #INTERVIEW

Featured News
Recent News
Archive
Search By Tags