Gilbert Doran Sr. "Mi trabou nobo no ta afektá mi bida komo músiko..."
"Mi trabou nobo komo Parlamentario no ta afektá mi bida komo músiko. Tampoko mi tin problema pa sigui ku mi programanan di radio, paso nan ta den mi oranan liber. Esei ku eksepshon ku ora tin un reunion kisas ku bai poko largu. ‘Fefe Farandulero’ ta un programa informativo ku pa kolmo ta pas ku mi trabou, miéntras ku ‘Happy Hour’ ta pa trese energia alegre den pueblo, unda tin petishon pa no stòp kuné", Gilbert Doran Sr. a deklará. Manera nos tur sá e konosido músiko lokal i hòmber di radio ku ta laborá na radio Mas 99.7 FM, a drenta polítika i awor ta un Parlamentario. Relashoná ku esaki, tratando na sá kon e lo bai kombiná su trabou nobo i su bida di músiko, Trendsz.NET a kòmbersá kuné, unda el a splika lo siguiente. "Mi ta keda normal ku mi bida den músika. Nada lo no kambia", tabata su promé palabranan. Mesora a probechá pa hasi e hòmber di ‘Ritmo Kombiná’, algun pregunta mas. Esaki relashoná ku plannan i posibel moveshonnan di su persona den farándula lokal. "Mi a kuminsá ku un proyekto. Esaki ta “Gio The Legends”. Ta algu manera “Fania All Stars”, kaminda nos ta toka riba pedido, pero no manera Gio Fuertisimo tabata toka kasi tur dia. Ta e intenshon pa toka no mas ku 3 biaha pa luna, unda preferibel lo ta 2 biaha. Banda di ‘Gio The Legends’, tambe mi ta para tras di e banda di mi yu 'Dibo', ku ta "ONE". Mi ta enbolbí den e parti di maneho di “ONE”, unda mi ta parti di e direktiva i ta e konsehero prinsipal. Pa loke ta Farándula mes, e rei di tumba mas hóben ku Kòrsou a konosé, a splika ku kosnan a kambia hopi. 'Gibi', a splika ku e merkado no ta 'rooskleurig' mas. Riba esaki el a duna ehèmpel indikando ku ántes tur dia fiestanan tabata hala 1,500 te ku 2,000 hende.
“Un fiesta ku 600 hende tabata malu i awor e ta unu hopi bon. E situashon tabata mihó. Awor e situashon finansiero ekonómiko no ta asina bon mas i tambe tin mas motibu ku hendenan no ta sali kas fásil mas pa bai fiesta". Pero pa loke ta su mes i su agrupashon musikal, un di e super talentoso músikonan ku Kòrsou konosé, a splika ku Gio The Legends a kaba di lansa un piesa nobo i awor ku e ta representante di MFK den e ‘college’ di mas haltu, E ta konsentrá riba piesa ku palabranan mas bunita i motivador.
