Clifton End a graba riba un produkshon internashonal di Kizomba
E konosido kantante yu di Kòrsou, Clifton End, aktualmente residensia na Hulanda tin un produkshon nobo riba merkado. Anteriormente Clifton End a sa di interpretá diferente hit, komo parti di agrupashonnan musikal Gio, Tune i tambe Cache Deluxe/ Royal.
Awendia, Clifton ta konsentrá mas riba su karera komo solista.
Den kolaborashon ku “Buzzbin Productions”, Clifton ta release “Give it all to you”, produsí pa “MB GettoFlow” i lo paresé den un kompilashon di Kizomba, huntu ku mas artista. Di akuerdo ku Clifton, “Ta trata di piesanan ku ya a kuminsá zona na Suesia, Spaña i Hulanda i ku durante di e siman aki, tambe lo por wòrdu skuchá i mirá na radionan i televishonnan di Kòrsou. Pronto nos lo lansa e vershon Spaño di “Give it all to you“ ku ta hiba e título “Solo para ti”. Banda di e kompilashon, ami huntu ku Buzzbin ta formando un EP di Kizomba, ku komposishonnan propio tantu na ingles i spañó. Esaki ku e propósito pa konkistá mundu, ya ku Kizomba ta hopi gustá na Oropa kompletu inkluyendo Rusia, Spaña, Fransia, Portugal i Skandinavia”. Clifton End tin hitnan inolvidabel entre nan, “Tantu Dushi”, “Esaki si ta bèrdat” i “It’s all about you”. Nan ta realmente muchu hopi pa menshoná. Trendsz.Net ta deseá Clifton End hopi éksito ku “Give it all to you“.
