‘Tune Stay Tune’ ta na Hulanda den luna di sèptèmber próksimo
E agrupashon musikal ku algun aña atras na momentu di nan debut a kousa basta furor den farándula di Kòrsou, ku entre otro temanan manera ‘Melissa’ i tambe ‘Oloshi’, Tune stay Tune, lo bai ta na Hulanda na inisio di luna di Sèptèmber awó. Esaki riba fechanan 1, 2 i 3 di luna 9 di e aña aki. E biahe pa tera friu, lo bai ta pa 3 presentashon. Esaki ta loke, Albertico ‘Tico’ Libiee, a konfirmá. Mas aleu el a papia tambe riba e agrupashon musikal mes i nan desaroyo.
“Aktualmente Tune ta toka riba pedido só. Kemen e banda no ta aktivo tur siman den fiestanan komersial mas. Nos ta toka solamente si tin pedido. Awor aki nos tin algun kompromiso privá i ta preparando pa nos biahe pa Hulanda, pa asina hasi un bon presentashon”, ‘Tico’ a deklará.
E front aktual di e agrupashon musikal ta konsistí di Albertico Libiee, Urvin Jano i Quincy Cicilia, miéntras ku ‘Jill’ Frans, tambe lo ta parti di e front den e presentashonnan na tera friu. “Relashoná ku tur esakinan tambe, nos a graba dos disko promoshonal speshal pa e gira na Hulanda. ‘Luwi’ ta kanta “Kara na laria”, miéntras ku ami mes ta kanta “Dushi regresá”. Nos ta pendiente pa ‘Jill’ tambe saka un kantika nobo ku Tune, paso manera ya bo sa e tambe lo ta den e ‘frontline’ pa Hulanda”, Libiee a añadí. “Naturalmente si tin promotor lo ke ‘Jill’ Frans tambe aserka den nos presentashonnan aki nan mes, esei tambe ta posibel semper. Nos lo bai tin algun fiesta komersial na kaminda, pero asina e fecha nan bira konosí nos lo divulgá esei”, e lider di e banda Albertico ‘Tico’ Libiee, a konkluí bisando.
