Adjatay nunka ta entregá


“Mi a kuminsá den Karabela na momentu ku mi wela a mira e try-out den korant. Einan tur kos a kuminsá kaminda mi por a demostrá mi talento ku mi tin pa ku kantamentu. Di einan mi a hasi un kambio i bai Vega i despues mi a bai Dreams”, tabata e promé splikashon di e kantante Sharrel Denisia, konosí komo ‘Adjatay’, riba su inisio komo kantante den farándula di Kòrsou. Mas aleu el a splika di ta nota un kambio den farándula lokal, ora e hasi un komparashon di su inisio i awor.

“Tin un diferensia mi ta kere esei tur músiko ta mir’é i sintié. Ku esaki mi ta referí na e yu'i Kòrsou, ku no ta kla pa paga fiesta fásil mas i bo ta haña bo ku naturalmente e ambiente di Happy Hour ku tin aworakí na diferente diskotèk na Kòrsou ta dominando farándula kompletu. Esei ta un di e puntonan sigur ku ami ta mira ku ta e kambio”, e kantante a splika.

Miéntras ku e hóben kende ta forma e front di Dreams, tambe tin su plannan pa futuro i a splika ku esakinan ta hopi, i ku sigur lo e kier logra hopi mas den bida- no den e área di músika so.

Adjatay a sigi splika ku e ta sinti su mes na kas den Dreams, “Tin un amistat hopi great den nos ku ta forma parti di e banda. Den tur esei mi ke bisa ku nos ta 1 i nos ta ‘deal’ ku otro komo un famia, pa nos sali di e porta di éksito”.

“Nunka mi no ta entregá. Esei ta e loke ku ami tin tur kaminda ku mi ta. Mi ta bai p’e. Mi no ta entregá ni maske kuantu sla mi haña i kuantu buèlta kosnan por kue. Pero mi ta keda fuerte i wak dilanti pa futuro i sigur no ta wak patras. Mi ta keda lucha i tin sigur ku mi fe ku mi tin, semper lo mi logra tur loke mi pone mi dilanti. Sigur den nòmber di Dios lo bai tin mas piesa ku sigur lo mi lansa”, e kantante ku ta moviendo aktualmente ku e kansion ‘Lag’é’ huntu ku Dreams, a finalisá bisando. Adjatay a konfirma ku tin algun grabashon, ku manera e mes a splika ta algun ‘kandela’ biniendo kaya, pa pueblo di Kòrsou.

#LOCAL #CURACAO #RITMO

Featured News
Recent News
Archive
Search By Tags