Mafalda Miguel, Izaline Calister i Shirma Rouse konfirmá pa konsierto ‘Caribbean Queens’
Djasabra dia 26 di ougùstùs ta fecha pa Caribbean Queens, riba e anochi aki Renaissance Curaçao Resort ta presentá 3 dama den konsierto, kada un di nan ku nan propio agrupashon musikal. Mafalda Miguel, Shirma Rouse i Izaline Calister ta subi tarima pa presentá un anochi eksklusivo di Caribbean Queens. Renaissance Curaçao Resort ta konosí pa su konsiertonan i e aña aki no ta un eksepshon.
Tur tres dama a presentá riba esenarionan mundial i djasabra dia 26 di ougùstùs próksimo lo duna públiko di Kòrsou un show den kual lo hasi un rekorido musikal den karera di kada un, ku interpretashon di nan hitnan, un tras di otro. Por konsiderá Caribbean Queens, tres konsierto den un! Loke ta hasi e konsierto aki diferente i alabes úniko ta ku tur 3 dama ta vèrsá den nan propio género musikal ku lo kondusí na un fushon masha interesante pa e anochi di konsierto. Lo kuminsá 7:30PM.
Mafalda Miguel lo pèrkurá pa e vibrashon latino, miéntras Izaline Calister lo sòru pa aksentuá e anochi ku su estilo di jazz pa finalmente Shirma Rouse ku su bos poderoso korona e anochi pa un eksitoso Caribbean Queens. E Ocean Front Park na Renaissance Curaçao Resort lo keda kombèrtí den un anfiteater pa akomodá tur bishitante di e gran konsierto.
Pa e okashon aki Renaissance Curaçao Resort lo bende karchi general Nafl 55. Ticket VIP lo wòrdu bende eksklusivamente na frontdesk di e hotèl. Karchinan VIP ta inkluí 2 bòter di bebida, 2 snacks i seating preferensial. Pa mas informashon tokante benta di karchi, VIP òf e konsierto por bishitá e página di Facebook di Renaissance Curacao Resort.
Lo tin parkeo grátis den e garashi di stashonamentu. Renaissance Curaçao Resort ta invitá tur fanátiko i amante di bon músika pa forma parti di un anochi ku sigur lo ta sumamente spesial!
