Francis Sling ta kontinua e historia tras di e obra di‘ 3 o ‘clock romance’


Den transkurso di fin di aña pasá nos tur por a apresiá kon e artista lokal, Francis Sling a tranformá un muraya den Skalo den un asombroso obra di arte.Francis Sling a duna e obra aki e nòmber di ‘3 o clock romance’.‘3 o’clock romance’ ta karga un mensahe hopi mas profundo i pa e motibu aki Francis a opta pa no laga e obra keda na djis un mural impaktante.

Hopi di nos, pasando den kayanan di Skalo, a para un ratu i apresia e obra ‘3’ o’clock Romance riba e muraya na Skalo kaminda antes tabata D.A.R.E. Pa hopi di nos e pintura ta simplemente un obra bunita. Sinembargo pa Francis Sling ‘3 o’clock romance’ ta representá un ekspreshon di dolor, un orashon na altisimo i alabes un mensahe na e pueblo di Kòrsou. Arte ta un forma impreshonante pa komuniká i pone hende pensa mas aleu riba temanan simpel di tur dia.

Netamente pa por komparti e mensahe aki Francis a sòru di kapturá e trajektoria mientras e tabata pinta ‘3 o’clock romance’. Resientemente Francis a kombiná e imagennan aki i a krea un klìp musikal basá riba ‘3 o clock romance’. Den e siman tras di lomba e klìp a keda publiká riba Francis su rednan sosial. E poësia rítmiko aki ta karga e nòmber di ‘Pajarita’. Den dje Francis ta presentá parti di su pensamentu tras di ‘3 o’clock romance’.’Pajarita’ ta konta e historia di 2 para ku kasualmente a topa otro un atardi 3or riba un taki. Durante e enkuentro aki nan a disfruta asina tantu di otro su kompania ku su siguiente dia, sin niun palabrashon, nan kada un a bolbe na e taki 3or di atardi sperando di bolbe topa. Meskos a sosode atrobe su siguiente dia, i e dia despues di esei i un biaha mas su dia siguiente. Importante den e relashon entre e dos paranan aki tabata ku nan no a hasi niun promesa na otro ni a palabrá un sierto malchi spesifiko pa nan relashon. Paso si esei lo tabata e kaso kisas un dado momento nan lo a sigui bin topa riba e taki simplemente pa kumpli ku nan promesa na otro i no paso nan tabata ke ta huntu enrealidat. Esaki hopi bia ta rason di hopi traishon i mentira den relashonnan; promesanan grandi hasí na otro kual a lo largo ta perde sentido i no ta karga e mesun nifikashon mas. ‘Pajarita’ ta pone enfasis riba amor inkondishonal. Un nivel di stimashon kaminda bo ta asina liber pa bisa i hasi tur loke bo ta sinti, sin kore e risiko ku paso bo a hasi e loke bo kurason ta desea e persona no ta sigui stimabo (meskos) mas. E klìp di ‘Pajarita’ ta aksesibel riba Francis su kanal di Youtube, riba Spotify i tambe por wòrdu pidí na tur emisoranan lokal.

Dianan 10 i 11 di Ougùstus próksimo Francis lo tene un eksposishan públiko basá riba ‘3 o’clock romance’. E ‘3 o’clock Art Expo’ lo tuma lugá na Skalo (van Raderstraat 13) for di 18:30 te ku 21:30 pm. Un i tur ta bon biní pa pasa i apresia e obranan ku Francis lo tin durante e eksposishon aki. Mas ku klaro ku bishitantenan lo tin e posibilidat pa kumpra tambe di e obranan ku lo keda eksponé den ‘3 o ‘clock Art Expo’.

#LOCAL #URBAN #NEWRELEASE

Featured News
Recent News
Archive
Search By Tags