Clifton End i Ephrem J. trahando riba un kizomba huntu!
Dos super kantante yu di Kòrsou, a uni pafó di tera, pa asina trese un grabashon kual sigur lo bai hala atenshon di mundu. Ta trata aki di dos kantante konosí internashonalmente, unda ámbos ta sakando kara di Kòrsou den eksterior i sa di laga bon impreshon atras, unda ku nan presentá. E dos artistanan, Clifton End i Ephrem J a topa i uni den eksterior i ta trahando riba algu ku sigur tin potensial di bira un hit internashonal.
Relashoná ku esaki, Trendsz.NET a hiba un kombersashon ku ‘Clif’ ku a deklará lo siguiente, “Ora mi tabata na Spaña dos siman pasá, mi a mira un post di Ephrem, indikando ku e tabata na Paris. Semper ku e gana mutuamente di traha ku otro, mi a komuniká kuné i a puntr’é si e tabata na Oropa, unda e la bisami ku e tabata na Hulanda te ku djaluna, ku ta e promé djaluna di luna di ougùstùs 2017. Dus mi a probechá pa traha un sita kuné pa ora mi yega Hulanda bèk. Na mi regreso mi a pasa busk’é i hink’é den nos laboratorio di ‘Buzzbin’. Aki nos a selektá un piesa, ku eigenlijk mi tabata bezig kuné for di yanüari, pero mi a lag’é para, paso mi tabata sinti ku e tabata falta algu. E ‘gai’ aki a yega i skirbi un kuplèt na spañó, masha master mes. Eksaktamente loke e piesa tabatin mester! There is definitely something cooking in the kitchen’. Esaki t’ei bira un ‘colab’ i ya tin palabrashon tambe, pa e skirbi un piesa pa mi so interpretá den futuro. Mi no gusta pone fecha, anto nòmber nunka ta ‘safe’ pa bisa”, ‘Clif’ a finalisá bisando.
