‘Hnry-B.’ grabando videoclip di su kansion ‘Ban bèk’

E konosido kantante yu di Kòrsou, ku ta profilando bon den farándula na Kòrsou, Henry Bernadina, konosí tambe komo ‘Hnry-B.’, ta grabando un videoclip aktualmente.

Ta trata aki di e videoclip di e kansion ‘Ban bèk’, ku su mes persona a kaba di lansa riba merkado algun siman tras di lomba. E piesa aki, a wòrdu grabá ku kompañamentu musikal di Dolce, unda Bernadina ta e kantante. ‘Hnry-B.’, ta parti di e front di e agrupashon Dolce, ku kua ya den pasado el a lansa algun hit, manera entre otro ‘It’s your turn’ i tambe piesa ku a bira kasi un himno nashonal den pasado, ku tabata ‘Mi gusta wak bo’. Banda di Dolce, tambe Henry den pasado a forma parti di e agrupashon musikal Danza, unda e tabatin e hit ‘Baby Boo’.

Miéntras tantu trabounan ta tumando lugá i lo no bai dura muchu, ku su clip ku ta wòrdu grabá na Kòrsou mes, lo bai ta riba merkado.

E videoclip di e kansion ‘Ban bèk’, ta relashoná ku e último tema ku el a saka ku Dolce, ku ta un piesa ku ta papia di un relashon amoroso ku a yega su final. Esaki apesar ku tin sintimentunan ku a keda, unda e ser maskulino ta aserká esun femenino ku e petishon pa por ‘Ban bèk’. E deseo den e piesa ta, pa nan por a bai bèk, dia i kaminda nan a konosé otro i a duna otro e promé sunchi !

#NEWS

Featured News
Recent News
Archive
Search By Tags