Ken ta Sherman Franciska ?

Awe nos lo sera bo konosí ku Sherman Franciska. Menshonando e nòmber sigur abo lo pensa ta ken esaki lo por ta ? Pero Sherman Franciska, mihó konosí komo ‘Chemsz Fransz’, ta kantante di e agrupashon musikal Orkesta Vega.

‘Chemsz Fransz’, tin 22 aña di edat i for di su 12 aña a kuminsá den músika, tokando instrumèntnan di perkushon. E mesun aña ei, el a bai forma parti di un grupo di aguinaldo. Un dia tabatin mester di un korista i el a ofresé su mes pa hasi esaki i nunka mas no a lag’é toka. Despues di mas o ménos un aña, el a pasa pa forma parti di e grupo rítmiko Karabela, kual el a forma parti di dje, pa algun aña.

Pa motibu di studio, el a bandoná Kòrsou i bai biba Hulanda.

Despues di algun tempu na Hulanda, unda tambe el a sigui den músika, entre otro profilando den un grupo di tambú, ‘Chemsz Fransz’ a pasa pa forma parti di “NSTYPLY”. Esaki a dura mas o ménos 6 luna, pa seguidamente e kantante aki a bin lanta su propio banda, kual tabata yama “Cristal Dice”. El a keda ku e banda mas o ménos 1 aña, te na momentu ku Sherel Semeleer, kende ta su tata, a aserk’é pa e bin Kòrsou i asina forma parti di Orkesta Vega, unda awor aki e tin algu mas ku 1aña na Kòrsou i ta parti di e front di e agrupashon musikal aki.

Sherman ta splika, “Den Vega mi tin 3 kantika original i algun ‘cover’, unda e ultimo tabata un piesa di Q-shans, ku yama ‘Otro manera’. Esaki tambe tabata e promé kantika ku mi mes a areglá i ta sumamente orguyoso i gradisí na Dios, di a laga mi deskribí e talento aki. Aktualmente mi ta den studio, grabando mi siguiente piesa original pa ku Vega, ku yama ‘Probechá’. Mi tin un ‘cover’ di Ronnie flex tambe na kaminda, ku yama “Bisa bo’, ku ‘Chemsz ft Ori Fransz’.

“Tambe mi ta bezig ku algun kantika di Urban, kual lo sali bou di un otro nòmber artístiko, ku mi lo anunsiá despues. E motibu di otro nòmber ta debí ku den Urban, mi ta un otro hende, kompará ku den e mundu di banda”. Pa loke ta Vega mes, nos tin hopi plan grandi, unda tantu ‘Wilo’ ku ‘Lèlè’, tambe ta grabando, pa asina nos por trese kos nobo pa nos fiel- i futuro fanatikonan”, asin Sherman Franciska a finalisá bisando.

#NEWS #CURACAO

Featured News
Recent News
Archive
Search By Tags