Rich Kalash feat. Izaline Calister huntu pa Kòrsou den tremendo ‘collabo track’


E kolaborashon musikal entre Rich Kalash i Izaline Calister no tin mester di niun introdukshon. Dos generashon ta topa otro den un vibrashon positivo kantando pa Kòrsou. Tantu e videoclip i e kansion a wòrdu hopi antisipá riba socialmedia, esaki naturalmente a oumentá kuriosidat di parti di fanatikonan di ámbos artista. Pregunta ta keda, kon e dos artistanan a yega na otro- un artista urban ku un reputashon kontraversial i un Reina di Tumba i gran eksponente di músika jazz. E kontesta ta simpel; Kòrsou!

Den union tin forsa, ora tin 2 artista di gran potensia manera Rich Kalash i Izaline Calister riba un track por spera únikamente kos bon, un fushon eksplosivo. Izaline a topa Rich na Hulanda, pa un introdukshon di e kansion. Despues di esaki, Rich a kumpli ku un di su deseonan i a invitá Izaline pa partisipá na e proyekto. Izaline su kontesta positivo a pone tur kos den akshon. E videoclip a wòrdu grabá na Kòrsou mustrando tur e maravianan di nos isla. Ekspreshon di libertat, dibertishon i naturalmente orguyo! E ‘teaser’ (1 minüt) di e videoclip a generá riba 37,000 views den 5 dia. E piesa, di ritmo afro moomba kombiná ku trap a keda produsí pa Greyan Pastor i Alex Sargo. Mester bisa ku e produktornan a hasi un tremendo trabou pa krea ritmo i elementonan den e piesa pa hiba e produkshon na un nivel internashonal.

Konsiderando e schedjùl drùk di ámbos artista a tuma sigur 3 luna pa terminá e videoclip. Resientemente Decoded a kompartí algun minüt di e videoclip riba Face book tambe. Por sigui ambos artista riba nan instagram i Facebook. Fanatikonan por mira e videoclip riba e Youtube Channel @decodedofficial òf solisit’é na nan radio preferí. Ademas, por stream riba ITunes, Spotify, Google Play i Apple Music.


Featured News
Recent News
Archive
Search By Tags