Glennsyl ‘Chucho’ Albertina, "Hasimentu di fiesta i organisá evento ta un arte.."


Despues ku kasi semper ta pone atenshon riba kantante, doño di banda òf músikonan, awe nos lo bai publiká un kombersashon ku un konosido promotor. Esaki pa loke ta su trabou i inisio den e trabou, ku tambe ta parti di e farándula. Ta trata aki di e Yu di Kòrsou, Glennsyl Albertina, propietario i direktor di G.A. Booking, Events Management and More, mihó konosí komo ‘Chucho’, kende ta establesé na Hulanda i tambe ta parti di e tim di maneho di e agrupashon musikal Cache.

“Semper mi tabata gusta evento i salimentu. Tabata dia ku mi a bai Hulanda pa studia i tabata sali basta bai fiestanan pa studiante ku mi a kuminsá yuda diferente promotor, ku e tempu ei tabata profilando bon. Entre otro mi tabata bai bende karchi pa fiesta i yuda nan ku promoshonnan. Ta ei mi a haña e oportunidat i mesora a skohe pa algu serio”, ‘Chucho’ a duna di konosé, splikando kon e la inisiá.

Riba e pregunta kon bin e ta mas aktivo den Urban, kompará ku un ritmo kombiná por ehèmpel, Albertina a kontestá, “Na prinsipio mi tabata move riba ámbos rango. Únikamente Ritmo Kombiná mi tabata atendé kuné solamente na Hulanda. Paso ei mi por kontrol’é i plania mihó, ku si mi ta na Kòrsou. Hasiendo negoshi, semper bo mester ta atento pa lokual ta mihó, miéntras ku na Kòrsou, mi a opta pa un kambio i bai den Urban.

Pues algu otro i nobo, dirigí riba un otro públiko i fanátikonan, pa asina evitá ku mi ta krusa den tereno di otro, kual por kosta ami mas trabou i tambe mas plaka. Hasiendo esei mi a haña ta great kon Kòrsou su mundu di Urban ta amplia su mes. Pa motibu di ta yuda hopi artista na Hulanda, mi a disidí tambe di kuminsá ku ‘tour’ na mi pais natal i organisá konsierto ku i pa nan na Kòrsou. Mi ta mira ku farándula no ta malu, pero bo mester kambia i adaptá bo mes na e esena i ei hopi ta kai atras”, segun Albertina.

Mas aleu ‘Chucho’ a splika di no ta haña ku ta bèrdat ku músika Urban tin influensia negativo riba nos hóbennan. “Mi ta kere mas bien tin rèpnan komersial i ‘underground’, unda e outornan ta ekspresá nan mes na nan manera, pero ku no ta e influensia dirèkt. Paso tur hende ta tende tòg i no ta tur ta hasi malu. Pues tin mas faktor. Ami no ta profundisá mi mes aden, paso komo promotor konsiente, mi ta sòru pa hasi tur kos positivo. Hasimentu di fiesta i organisá evento ta un arte i si for di dje bo tin entrada, ta un bendishon”, segun e promotor i organisadó di Urban Festival riba nos isla.

Pa loke ta e plannan i eventonan pendiente, Albertina a splika ku na luna di desèmber próksimo lo e tin un ’tour’ ku “Broeder Liefde”, ku ta trahando riba nan EP- nan lo pasa Aruba, Kòrsou i Sürnam. Asina tambe e konkluí su eventonan pa aña 2017, esaki despues ku aktualmente e ta organisando mas tantu konsierto i festivalnan, komo eventonan pa algun klup, ku e meta tambe pa habri kaminda pa promotornan mas hóben i e generashon nobo kuminsá profilá nan mes, pa ekspanshon i otro posibilidatnan.

#CURACAO #URBAN #ARUBA #LOCAL #EVENTS

Featured News
Recent News
Archive
Search By Tags