Un proyekto nobo…..”JJ – Randy – Ray”


Un proyekto nobo ta bai mira lus di dia den farándula di Kòrsou. E lo bai konta ku 3 miembro, unda tur 3 ta kantantenan yu di Kòrsou i sigur no personanan deskonosí den farándula. E trio aki a uni i entrante djamars benidero dia 19 sèptèmber 2017, lo hasi nan gran debut. Ta trata aki di un proyekto formá pa un trio ku sigur lo bai hala atenshon den tur sentido di palabra i ambiente ku por presentá.

E proyekto, ku ainda no tin un nòmber ofisial, ta konta ku e kantante solista ‘Juni’ Juliet, konosí pa diferente hit i e último ku ta “Mal enamorá”, kende lo bai ta huntu ku Randy Cordelia, konosí den farándula komo Randy Leroy aktualmente den Gentz i tambe e hóben kantante Ray Lauffer, tambe den Gentz i Axl & Friends. E dos últimonan aki, tambe ta parti di e front di e agrupashon musikal Gentz.

Randy Leroy ta konosí pa diferente hit, e último ‘Kruel” huntu ku Gentz, miéntras ku Ray Lauffer, ta kantante di e piesa “Nada pa niun hende”. E manera kon ambos artista a bin ta profila, ku diferente ‘cover’ a bin ta hala atenshon di diferente produktor. Ta e intenshon pa e proyekto aki start ku un tradishon riba tur djamars. Entrante djamars awor 19 sèptèmber 2017, nan lo ta na O’mundo, ku un Happy Hour inisiando for di 9’or di anochi, unda un ta paga i dos ta drenta pa gosa.

E trio aki, kende tambe sa kon pa pone ambiente, lo bai ta hopi diferente den nan presentashonnan, ku músikanan Pòp, Merengue, Bachata, Reggeaton i Reggea Roots. Pues un kombinashon di tur un poko. Despues di e debut na O’mundo, tambe ta pendiente pa un fecha fiho na Madero.

“Masha tempu nos tabata kana ku e idea pa hasi algu huntu i porfin nos a haña e oportunidat pa hasié. Miéntras ku nos ta pensando riba un nòmber spesífiko, nos lo bai hasi un grabashon i lansa un piesa nobo, promé ku aña 2017 kaba, unda nos tur 3 huntu, lo bai ta kantando. Lo bai bira un reprodukshon di un piesa ya eksistente, unda nos ta bai hink’é den un bachi nobo. Otro siman nos ta drenta studio”, Randy Leroy a deklará despues di a konfirmá e informashon, pero no kier a bai den muchu detaye mas, pa loke ta entre otro e piesa i tambe su nòmber.

#NEWS #LOCAL #INTERVIEW #CURACAO

Featured News
Recent News
Archive
Search By Tags