Boneiru tin ‘Fenty Music’!


Fenty Music ta un agrupashon musikal ku ta destakando na e isla di Boneiru. Ta trata aki di un banda ku tin apénas 1 aña di eksistensia i ya a marka su nòmber i entre otro a kompañá diferente konosido artista, ku tabata di bishita riba e isla. Relashoná ku esaki, nos a kòmbersá ku lider di e agrupashon musikal, kende ta Janou Troeman, “Manera semper, tur masterplan ta kuminsá na un idea! Fenty Music ta un idea di mi persona, aktual perkushonista i lider di e banda. Despues di a presentá e masterplan na Omar Robles Medina i tambe Faysel Francisco, huntu nos a pone e proyekto riba pia i te awe Fenty ta sigur un éksito na Boneiru.

Despues di a forma e tim, Fenty a hasi su debut dia 2 di Sèptèmber 2016 i ya a kompañá diferente artista for di Kòrsou i tambe internashonal, manera entre otro Dibo D, Hunnely Felicia, La Diva GG, Richie Rich, Danny Janga i tambe Jimmy El Leon”, Janou a splika.

Riba preguntanan hasí mas aleu, e la kontestá ku e banda Fenty ta konta ku un front ku ta konsistí di 3 kantante, kende nan tur ta hopi gustá. Ta trata di Gerald ‘Ger’ Alberto, ‘Beto’ Martis i tambe Jurnick “JC” Clarenda.

Miéntras ku esnan ku tambe ta forma parti di e famia di Fenty Music, ta Omar Robles Medina (Manager), Faysel Francisco (Direktor Musikal), Janou Troeman (Band Leader), Gino Offerman, Garrick Angela, Apo Martines, Almar Nicolaas, Farley Silvaro, Philip Bernabela, Jerrysen Albertus, Jose Daniel Lugo i Carlos Palencia.

Durante di e promé aña di eksistensia di Fenty, nan a sa di saka 2 piesa propio, ku ta “Lag’e lus paga”, kanta pa Gerald ‘Ger’ Alberto i tambe “Ku bo mi ke hasi”, ku ta interpretá pa ‘Ger’ i tambe Irsais. Huntu ku e piesa “Ku bo mi ke hasi”, Fenty a lansa tambe su promé videoclip. Durante di e periodo di Karnaval, Fenty a wòrdu koroná komo e banda di e temporada, unda nan a sa di logra e promé finalista den festival di tumba 2017. Esaki ku e tumba “Awe mi tei chang’é”, interpretá pa Jurnick “JC” Clarenda.

Banda di esei tambe “JC” a pega algun ‘Cover’, ku ta hopi toká i gustá, tantu na Boneiru, komo tambe na Aruba i Kòrsou. Ta trata di e piesanan manera “Bon Dushi”, “Felices Los 4”, “Bo no bèk” i tambe esun ku a hasi furor na Boneiru ku ta “Sebe”.

Resientemente Fenty a kaba di selebrá nan promé aña di eksistensia, den un fiesta baliabel huntu ku ADD9 i tambe DJ Ash i próksimamente tin sigur 5 piesa pa sali riba merkado. Unda komo primisia ku por wòrdu divulgá, manera Janou Troeman mes a deklará, lo ta un piesa unda ‘Beto’ Martis lo interkambiá di bos ku un dama super popular na Boneiru.

#NEWS #BONAIRE #LOCAL #RITMO

Featured News
Recent News
Archive
Search By Tags