‘DJ Danger’ for di 1 òktober na Radio Hoyer

Ludwig Isabella, konosí komo ‘DJ Danger’, próksimamente lo bai ta na un otro radio emisora. Esaki manera e propio DJ a konfirmá den kombersashon sostené. “Entrante dia promé òktober lo mi kuminsá traha na Radio Hoyer”, tabata e kontesta riba e pregunta unda lo e bai ta próksimamente, despues di a tuma su retiro for di Radio Krioyo, manera ya ta konosí.

“Manera mi a primintí bo, mi ta kumpli di bisa abo komo e promé”, e ‘DJ peligroso’ i un di e bon nan pa loke ta propagandanan radial, a duna di konosé, konfirmando di lo bai ta den aire na Radio Hoyer, E Solo di Pueblo, riba frekuensia 101.9 FM, for di òktober di e aña aki .

‘DJ Danger’ a inisiá su karera na radio, komo empleado di radioemisora Geminis 106.1 FM, ku seguidamente a bira Radio Fiesta 106.3 FM. Tabata na aña 2004, ku e la bai forma parti di Radio Krioyo 90.1 FM, yudando den e parti tékniko, di luna di aprel te ku yüli. Radio Krioyo mes a bai den aire dia 26 yüli di e aña ei, ku ta dia di Kòrsou i for di e fecha ei te ku awor, e ta laborando na e radioemisora situá riba Gosieweg.

“Mi a entregá mi karta di retiro na gerensia di e radio, dia 10 sèptèmber ku a pasa i lo ta den servisio di e radio aki, te ku dia 30 sèptèmber awó, gosando di mi dianan di fakansi i dia 1 òktober lo mi inisiá na Radio Hoyer”, e konosido Ludwig ‘DJ Danger’ Isabella, a splika.

#NEWS #LOCAL

Featured News
Recent News
Archive
Search By Tags