Debut di “One of a kind” huntu ku Vega na Aruba
Próksimamente un agrupashon musikal lo bai mira lus di dia na nos hermana isla Aruba. Ta trata aki di un agrupashon musikal, ku lo bai toka hopi variá, ku konsentrashon tambe riba un tiki di urban music i kla pa por deleitá tur edat i komplasé tur smak. E banda aki lo bai debutá den farándula, bou di e nòmber “One of a kind”. E fecha pa e gran debut lo bai ta riba dia 27 òktober benidero. Esaki den un mano a mano ku Orkesta Vega direktamente for di Kòrsou, den un fiesta baliabel ku ta tuma lugá den ‘Cage Night Club’.
Lo bira un anochi ku bon músika, unda pa promé biaha tambe Orkesa Vega di Kòrsou lo ta tokando na Aruba. ‘One of a kind’, lo bai konta ku un front di 4 kantante, ku lo bai ta formá pa e lider di e agrupashon musikal, ku ta Jurick Salomon, huntu ku tambe Jurainy Luckert i tambe Donovan Henriquez. E di 4 kantante di e banda, ainda Jurick no kier divulgá ta ken. Esaki durante di un kombersashon sostené. “E lo bai ta un sorpresa. Loke si mi por bisa, ku e ta un super bon kantante”, Salomon a deklará.
