Jeon, “Mi ta trahando awor hopi mas strukturá. Tur kos tin su tempu..”

E konosido músiko, kompositor i kantante arubano, Jonathan Thiel, mihó konosí komo ‘Jeon’, den pasado tambe konosí komo ‘Biggy Boy’, tin diferente proyekto na kaminda. Esaki manera e mes a splika, unda e ta premirá ku aña 2018, lo ta un aña grandi pa su persona.

E artista arubano, kende awor ta bibando na New York i trahando ku e artista internashonal, e kolombiano Jose Alvaro Osorio Balvin, konosí komo “J Balvin”, tin un komposishon ku un i tur ta pendiente p’e pa wòrdu lansá. Ta trata aki di e piesa titulá “Machika”. Tambe e mes a splika ku lo e bai ta un komposishon yamá “Mil palabra”, ku lo bira un proyekto grandi, unda e ta pone atenshon i saludá islanan ABC- Aruba, Boneiru i Kòrsou.

Promé ku esakinan ku lo bai tuma lugá na aña 2018, durante di e di dos siman di luna di òktober 2017, lo e lansa un piesa titulá sesenta “60”, dediká spesialmente na su mayornan. Esaki debí ku su tata tin 59 aña di edat i su mama pronto tambe lo yega 60, unda el a opta pa e título, den kual piesa e ta elaborá ku na momentu ku bo alkansá 60 aña di bida, bo mester wak atras kon dushi bida ta, gosando sin ningun preshon i manera abo ta deseá.

Mas aleu e la splika ku awor no ta manera ántes mas ku ta traha riba algu awe i lans’é mañan. Mester warda e momentu apropiá i traha strukturá. Un ke otro pa asina por tene kuenta ku e temporada i pa e por logra premionan etcetera i kana su kaminda, kual ta pone ku mester pone atenshon na e temporada.

‘Jeon’ a duna di konosé tambe di ta trahando riba diferente otro proyekto, unda tambe e ta na enkargo di algun ‘beat’ pa e rèpernan venesolano ‘Chino’ i ‘Nacho’.Mas aleu tambe arubano/merikano a duna di konosé ku kosnan ta bayendo bon i ku tin diferente ‘label’ ku a mustra interes den su persona, pero ku su focus ta otro aktualmente i kier ta independiente.Finalmente e artista, a splika ku kosnan ta bai sin muchu preshon i e no kier kana muchu lihé, unda ku bo ta wak flur so, i pa no dal den ningun hende, sin ta wak rònt di bo mes tambe, konsehando un i tur pa disfrutá di tur lokual ku bida ta duna, pa logra metanan.

#LOCAL #NEWS #NEWRELEASE #ARUBA #INTERVIEW

Related Posts

See All
Featured News
Recent News
Archive
Search By Tags