Semii Marten despues di “Lalala Love 4 You” awor ta ‘Kla kuné..”


“Semper for di chikí mi tabatin e soño di bira un kantante/ bailarina. Mi a lanta den un famia di hopi músiko, pues esei tabata mi meta semper, pa ta den músika”, e hóben Semii Marten a reakshoná, riba aserkamentu di Trendsz, pa ku su motibu di a skohe pa kantamentu. “Mi tabata gusta skibi mi mes kansionnan, pero nunka a intentá pa publiká nan, pero si mi tabata ‘cover’ sierto kansionnan ku mi gusta. Ku mi 13 aña, mi a kanta komo ‘opening act’ di defuntu Percy Sledge, ku ta kanta 'When a man Loves a woman' i 'My Girl'. Tabata ei nan ku e reakshon di e públiko a motivá mi pa sigui ku kantamentu. Finalmente tabata aña pasá, ku porfin mi a tuma e paso pa saka mi propio kansion”.

Pa loke ta su mes persona Semii, a finalisá su estudio e aña aki i tin tantu Kòrsou komo Boneiru komo su kasnan, “Mi a nase na Kòrsou, pero mi a lanta na Boneiru. Tabata ku mi 16 aña, ku mi a bai biba Kòrsou bèk, pa mi por a hasi mi estudio. Ta trata di e estudio di ‘Bachelors’ den ‘Pedagogie’.

Durante di e periodo di mi estudio na Kòrsou, mi a saka mi promé kansion, kual ta “Lalala Love 4 You” i esei tambe a zona bon na diferente radio, tantu na Kòrsou, Boneiru, Aruba, Hulanda i asta na Miami.

Awor ku mi a kaba ku mi estudio, mi a saka mi di tres kansion original.

“Kla kuné”, ta e título di e kansion ku mi a skibi tres luna pasá i Jaido tambe a skibi su mes parti. Mi a tende e ‘beat’ i outomátikamente mi a kai riba e tema aki, ku ta algu ku tur hende a yega di pasa aden, kual ta traishon òf kurason kibrá”. Splikando riba e kontenido, Semii a konta mas aleu di a hinka su mes den e situashon ei, pa por skibi kiko un persona lo ta pensa i sinti den e momentunan ei. Tabata tambe asina, ku e kansion “Kla Kuné”, a nase!

Riba e plannan di e artista pa ku futuro, Semii a bisa lo siguiente: “Mi plannan pa futuro ta pa sigui saka mas kansion, músika i video, i sigui ku un estudio mas tambe”. “Ainda mi no tin ‘featuring’ ku otro artista planiá, pero mi ta habrí i dispuesto pa traha ku mas artista. Basta mi gusta e idea ku presentá, lo mi ta ON sigur p'e !”

#BONAIRE #CURACAO #LOCAL #INTERVIEW #NEWS #NEWRELEASE

Featured News
Recent News
Archive
Search By Tags