D’Licious huntu ku Gentz den Spoonz 30 desèmber próksimo
Riba djasabra dia 30 desèmber próksimo lo bai tin e fiesta pa sera aña 2017 na Kòrsou. Esaki den diskoteka Spoonz, situá den Saliña. Direktamente for di Aruba, lo ta presente na Kòrsou, e agrupashon musikal D’Licious di e hit ‘Deskonfia...’, ku su kantantenan Jerrino, Dwayne i Jason. Esaki pa asina kombiná den un fiesta baliabel riba e último anochi di 2017, kual fiesta ta inisiá promé ku 12’or, huntu ku Gentz. Resientemente Amos Balentien a reprodusí e piesa hit di Jerrino ku un bon akohida na radionan di Kòrsou.
Gentz, formá pa kantantenan Amos, Randy, Ray i ‘Djudju V.’, lo representá Kòrsou den e fiesta aki. Pues despues ku D’Licious tabata na Kòrsou den un fiesta baliabel for di dia 2 novèmber di aña 2014, unda nan a toka ku GIO Fuertisimo na Kokobomba, na desèmber awó, nan lo ta bèk riba nos isla. Tantu Archel Calister di Gentz, komo Jerrino Bass di D’Licious a konfirmá e kombinashon den e fiesta baliabel aki, pa Trendsz. Pues fanátikonan di bon ambiente i fiesta, por ta pendiente pa D’Licious na Kòrsou, den un fiesta mano mano ku Gentz, ku lo bai ta den kurason di Saliña, den diskoteka Spoonz.
