Freddy Richardson pronto ku mixtape "Road ku Rasta"
E konosido kantante arubano Freddy Richardson, kende ya Trendsz a kombersá kuné den pasado, ta den notisia atrobe. Esaki na momentu ku e ta trahando riba algu ku lo bai ta riba merkado pronto.
Freddy ta trahando riba un ‘mixtape’, unda manera e mes a splika kier pa un i tur konosé su persona di bèrdat i sinti ku di bèrdat nan ta riba un ‘road’ ku un rasta, debí ku e tambe tin e kabeinan estilo rasta.
Pa loke ta fecha eksakto ku esaki lo subi kaya, segun e ‘rasta kantante’, lo bai ta un sorpresa. “Ainda mi no tin un fecha eksakto. E ta bai sali di un dia pa otro. Solamente un i tur mester sigui mi riba mi snapchat “Roadcurasta”. Lo por bai mira filmashon kompletu di mi bida di bèrdat. Nan lo mira tur ‘behind the scenes and bloopers’ riba e filmashon, pa na final nan tende e ‘mixtape final proyekto’!”, e kantante a duna di konosé. Mas aleu e la sigui splika, “Lo bira un ‘mixtape’, ku lo bai kontené 8 pa 9 ‘track’. Tur ta tema i konseptonan di mi persona, unda kada artista invitá a komponé nan mes parti”, ‘Rasta Freddy a sigui splika.
‘Rasta Richardson’ tambe a kompartí ku ta trata aki di un produkshon, unda e ta wòrdu kompañá pa entre otro artistanan Ir-Sais, Ron Martis, Rocco Franken i algun sorpresa mas. Entre e piesanan ku lo bai skucha, tin ku ta hiba di titulo “Ta bo ta disidí”, “The one for me” i tambe “Mihó bo so”. Miéntras ku tambe e kantante ta trahando riba e videoclip nan di e diferente piesanan, unda tambe e la ekspresá e deseo pa pronto lo e por ta presente ku su shownan, tantu na Kòrsou, Boneiru i Hulanda.
