‘Dayo’ ku piesa nobo titulá “Niko sawa”
E konosido artista yu di Kòrsou, ‘Dayo’ Martis, kende ta biba na Hulanda, ta bai lansa un piesa nobo riba merkado. Ta trata aki, manera e mes a duna di konosé den un kombersashon sostené ku TRENDSZ, di algu ku ya pa un tempu e tabata kanando kuné den mente i lo bai bira realidat.
“Mi ta pidi tur mi fanátikonan pa tene poko pasenshi i ta pendiente. Mi ta bai lansa algu ku pa ya un tempu mi tabata kana kuné den mente. Ta algu apart kual ya pa un tempu mi tabatin e deseo pa hasi realidat”, e artista konosí den e mundu di Urban a deklará.
E piesa nobo ku lo bai sali kaya próksimamente, lo bai hiba di nòmber “Niko sawa”. “Niko sawa” ta nifiká ku tur kos ta bon. “Mi ta ok”. Ta trata di un piesa, ku ta bai tokante di persona(nan) ku tabata den ’pleitu’ ku otro i ta akusá otro di tur kosnan malu ku a bai den nan relashon. “Pa e proyekto aki, mi a skohe pa ‘Afrohouse’ i a hasi uzo di e idioma di Afrika, ku ta ‘Swahili’, uzando e palabra ‘Niko sawa’”, e artista Yu di Kòrsou a deklará na TRENDSZ, splikando ku ainda e no tin fecha si pa esaki ta riba kaya, debí ku ‘cover’, ainda no ta kla.
Dayo ta konosi pa su hitnan: "Niun Manera Bo", "Queen Den Mi Side" i varios mas. Ultimo e tabata tin un kansion huntu ku Brian D, titula "Buskando Bo Kara.."
