Cache Royale grabando nan CD pa fin di aña
Manera ya ta un tradishon pa algun aña kaba, e agrupashon musikal Cache Royale, ku ta establesé na Hulanda, tin su CD di fin di aña riba merkado. Apesar ku e banda, e aña aki despues di basta aña, lo no ta na Kòrsou, pa luna di desèmber i kambio di aña, tòg nan lo kier a laga nan fanatikonan i tur amante di bon músika i ambiente, tende di nan.
Despues ku e banda últimamente tabata hopi den notisia, pa algun desaroyo interesante i kambionan ku a tuma lugá. Nan ta kla, pa sigui deleitá nan fanatikonan, manera semper nan a sa di hasi, kual ta prueba ku Cache Royale, ketu bai ta dal. TRENDSZ a hiba un kòmbersashon ku un di e kabesantenan di e banda, kende ta Richel Calister, kende a konfirmá ku tin un CD na kaminda.
“Bèrdat nos ta grabando i ta e intenshon pa medio desèmber esaki ta riba merkado. Lo bira un kompakto, ku lo konta ku 9 piesa, di kual 6 nobo grabá den studio i 3 ‘live’. Ainda nos ta den studio si. E CD lo konta ku piesanan den bosnan di e kantantenan Tsean, Daniel, NJ, Quincy, Ivanhoo i Qshans, ku nos ta spera sigur lo bai ta na agrado di un i tur”, Calister a deklará. Miéntras tantu ya na inisio di e siman aki, un di e piesanan ‘live’, ku lo bai ta riba e CD, a kuminsá zona na radio-emisoranan. Ta trata di e piesa “Bo meresé ”, den bos di e kantante ‘NJ’.
