Amos Balentin, Djuric Virginie i GG yamá pa forma GIO 'nobo'


Den transkurso di e siman aki hopi ta e rumornan pa ku lantamentu di GIO den 2018. Ounke e rumornan ei a posishoná HnlY Felicia i GG den aliniashon di e banda, tòch awe nos a risibí informashon ku enrealidat ta Amos Balentin, Djuric Virginie i GG ta esnan promé pa forma e aliniashon di e GIO nobo. HnlY ta preferá di mantené su status di ‘solista’ i presentá na unda ku e wòrdu kontratá sin ta mará na niun organisashon spesífiko.

Invershonistanan pa e GIO nobo den forma stratégiko a hinka un masterplan den otro pa sobrebibensia di farándula na Kòrsou- hasta tin papiá ku a hasi un proposishon pa kompra di Festival Center. E meta primario, kibra e monopolio den farándula.

Si enberdat Amos Balentin i Djuric Virginie a risibí un oferta, esaki ta nifiká ku Gentz lo pèrdè 2 kantante den nan frònt. Ku ta nifiká ku e banda lo mester kuminsá shòp pa kantante (i kisas músiko) nobo.

Gentz aktualmente ta un di e bandanan mas popular di Kòrsou i pa sigur 2 aña desde di nan introdukshon a konta ku un fanatikada sólido, presentashon na nivel i vários hit. E tim di maneho semper a traha konsistente i tabata masha kreativo den presentashon di e banda. No tin duda, ku si dado kaso nan pèrdè 2 kantante, nan lo sá di rekuperá.

Un front di Amos Balentin, Djuric Virginie i La diva GG ta un kos serio! Nan lo asepta?

Sumanan kuantioso a subi mesa pa e kantantenan ku a wòrdu yamá pa forma GIO. Ofertanan ku difísilmente por laga pasa. Tin di nan te hasta ‘to good to be true’. Ademas di esaki, a ofrese un pago ku ta sigur 4 bes mas tantu ku e pago usual. Ya kaba den pasado Gentz a bòltu e ‘wega’, ora ku na formashon di e banda e tempu ei tambe a sigur dòbel òf triplifika e pago pa toká di kada kantante i músiko, poniendo e tempu ei, e propio GIO den un skina kayente.

Riba un 'stand by'.... Den tur esaki, e kantante ku ainda no a wordu menshoná den e tanda di rumor e siman aki ta e propio Gilbert Doran Jr. Dibo D no a wòrdu menshoná ainda. Un GIO sin un Doran? HnlY Felicia kisas ainda ta riba un 'stand by'...

Bon pa Farándula

Ku esaki ta un bon moveshon, esei ta sigur. Invershon, inovashon den industria semper ta bon biní- esaki lo pèrkurá pa un ‘game change’ i tambe pa un panorama nobo i diferente pa farándula di Kòrsou.

Klaro, nos no a risibí konfirmashon di niun kantante (ainda) pero meskos ku tur página òf website di farándula tin un teoria, TRENDSZ tambe tin un. Kos lo bira interesante.

#LOCAL #CURACAO #RITMO

Featured News
Recent News
Archive
Search By Tags