‘Ray-K’ ku piesa i videoclip nobo huntu ku Buleria
Raynold ‘Ray-K’ Kelly su promé piesa original huntu ku Buleria, lo sali kaya despues di e promé fin di siman di luna di mart 2018. ‘Ray-K,’ ta forma parti di e front di e banda Buleria i tabata den pasado tambe parti di e agrupashon musikal, tambe di Aruba, D'-Licious.
E piesa lo bira e di 2 piesa ku Buleria ta manda kaya pa aña 2018. Lo bai ta un Ft. huntu ku ‘Wichi’ i tambe ‘Ty’, kende nan ta konosí den e mundu di Urban na Aruba. ‘Wichi & Ty’ ta konosí pa e piesa ku a dal duru, titulá “Bo’n ta bo so”, ku tabata un produkshon huntu ku Zyon. Resientemente, Buleria a lansa e piesa ‘Hello’ den bos di e kantante, kende mas resien a djòin e banda, Jair ‘Buddy’ Vesprey, i Reinier ‘Reintje Rock’ Lijfrock. Relashoná ku e piesa nobo aki, TRENDSZ a hiba un kombersashon ku e kantante, nèt promé ku lansamentu di e piesa.
‘Ray-K,’ a splika lo siguiente:
“E nòmber ofisial di e piesa nobo, lo ta “Cheater”. Ta un piesa ku ta kompositá pa Quincy Comenencia i Dwight Leoneta, miéntras ku e areglo, ta den man di Dwight Leoneta mes. Nos a disidí di sak’é, di biaha huntu ku su clip, na komienso di e siman aki mes. Emoshonnan ta haltu skuchando e piesa nobo aki kada ratu, i ta purá pa e dia yega. Mi no tin duda ku esaki lo pone un stèmpel mas pa Buleria, den e mundu di farándula”. “MamaMia, ata mi na rudia !”
