Url Isenia ta skor haltisimo ku “E lugá ku mi meresé”


Url Isenia ta feat. Daniel ‘Dan-Dan’ De Jong riba e mas resiente kansion titulá, “E lugá ku mi meresé”. Url ta un kantante, kompositor i produktor ku kisas muchu tiki bes ta wòrdu pone den spòtlait. Url, komo kantante prinsipal di agrupashon musikal Sonnos Band ta distinguí su mes, ku un zonido partikular, e mesun ‘vibe’ bo ta haña den piesanan manera ‘Bo amor so mi ke’ na 2012, ‘Kamber 18’ – un éksito rotundo pa Url na aña 2013 i tambe awe na 2018 “E lugá ku mi meresé”.

TRENDSZ a kombersá ku Url, riba e piesa aki i tambe su plannan pa futuro, “E piesa ‘E lugá ku mi meresé’, a bini debí ku mi a yega na e idea pa hasi algu kompletamente otro, despues di 1 aña i mei, sin saka nada nobo. Relashoná ku esaki, mi a pensa riba algu diferente i esei a inspirá mi, pa bin ku e piesa aki. Mi ta kontentu kon a kuminsá asept’é i ta pendiente pa presente bibu próksimamente huntu ku ‘Dan-Dan’ ya ku e tambe ta move ku Sonnos, na momentu ku tin tokánan grandi”. Pa loke ta su plannan pa futuro, Url Isenia a splika di ta hasiendo produkshonnan pa diferente artista, ku próksimamente nan lo bai ta riba merkado i ta spera ku nan lo kai na agrado. “Mi ta sigui produsí pa diferente artista, manera entre otro Dongo, Junior Tecla i Naomi Silvanie, kende nan pronto lo tin kos nobo. Miéntras ku mi mes tambe tin un piesa klá i grabá kaba, di ritmo Urban, ku lo mi bai lansa pronto. Huntu ku ‘Dan-dan’, mi ta trahando riba algu nobo kaba i mester keda pendiente.”

Finalmente, Url Isenia a duna TRENDSZ, un ñapa, di loke ku ta spera, durante di e lunanan benidero. Ku Ovega, lo bai tin e piesa “Habri Bo Kurason”, ku lo ta produsí huntu ku Getamilli. Junior Tecla ft. ZOINX, lo bai interpretá “Ta ken Bo ta ?” Hype ft. ‘Dan-Dan’, lo lansa e piesa “Konsentrá”, miéntras ku e konosido ‘Dongo’, lo ta interpretando “No Lubidá”.

#CURACAO #NEWRELEASE #NEWS

Featured News
Recent News
Archive
Search By Tags