Rumor insistente ku Gentz lo keda disolvé


Den e ‘wandelgang’ di farándula tin hopi kos ta wòrdu papiá, un di nan ta e aserkamentu na Raynor Lauffeur. E biaha aki no pa forma parti di GIO, ya ku e frònt pa GIO ta kla kaba, i a keda konfirmá despues di e último reunion na Jan Sofat- pero lo a kuminsá planta e idea pa Ray Lauffeur forma parti di Dreams bèk. Esaki mesora lo nifiká tambe ku e mesun ‘invershonistanan farandulero lo tin un ‘dede den e papa’ pa fortifiká agrupashon musikal Dreams. Ta bira opvio pa Trendsz, ku di un forma sistemátiko ta purbando na desaktivá un di e agrupashonnan musikal mas prominente den farándula aktualmente, Gentz Tre’Chic.

Segun informashon, lo a presentá un suma kuantioso na Raynor Lauffeur dia a ‘planta’ e idea na e kantante, ku ya kaba a deklará na Trendsz, ku e lo bai enfoká muchu mas riba su karera komo solista. Di otro banda, den e mesun ‘wandelgang’ di farándula, tin komentá ku kisas enbèrdat lo a logra desaktivá Gentz Tre’Chic- ya ku maneho di Gentz ta kana ku e idea, di disolvé e banda, i lag’e presentá únikamente pa okashon spesial.

Ta pendiente pa anunsio ofisial di parti di e ‘invershonistanan farandulero’ riba fecha pa e lansamentu ofisial di GIO. Un kos ta sigur, GIO ku e frònt di Djuric Virginie, Hunneley Felisia, Amos Balentien i Steven Daniel lo sòru pa un buèlta interesante den farándula i mesora sin sikiera saka un piesa, lo ta e banda mas komentá. Ya kaba Trendsz a komprondé ku e preis di toká lo ta aproksimadamente 7,000 florin. Esaki ta masha lógiko konsiderando e ‘payroll’ haltu ku e banda lo tin. Riba e ‘wish list’ di e mesun ‘invershonistanan farandulero’ tin un nightclub tambe...

Buèltanan interesante den farándula di Kòrsou. E ‘invershonistanan farandulero’ ta preparando pa un ‘showbizz domination’ - nan a kombersá ku BDM tambe, i ya kaba Trendsz a anunsiá ku Brian Dekkers ta na kaminda pa Kòrsou próksimamente; e lo mester ta na Kòrsou den ultimo siman di April.

Di ayabanda, a wòrdu menshoná ku TSean lo ta na kaminda pa Kòrsou pa fortifiká Gentz. Riba su mes un idea genial, mirando ku Tsean su só, tin potensial di yena un sala na WTC. Un frònt di Ray, Randy, TSean- i kisas un ‘nobato’ mas lo por pèrkurá pa Gentz permanesé den e panorama farandulero di Kòrsou. E pregunta ta keda si GIO i Gentz por tin ko-eksistensia. Atrobe, buèltanan den farandula ta masha interesante.

Trendsz, breaking the entertainment news!

#NEWS #CURACAO

Featured News
Recent News
Archive
Search By Tags