Dibo D i Randal Corsen ta presentá "Mama Pa Semper"


Pa dia di mama, Randal Corsen i Dibo Doran ta presentá un sho speshal pa mamanan di tur edat titulá ” Mama Pa Semper”

Randal Corsen e gran músiko pianista internashonal yu yi kòrsou, kende dia 4 di mei lo bai risibí e premio “Cola de Brot”, huntu ku e talentoso hóben músiko/kantante/kómiko, Dibo Doran, ta trese e gran sho aki. E sho lo wòrdu kombiná ku un tiki di humor i hopi músika di tur género i riba nivel pa e públiko presente por gosa. Tur esaki lo tuma lugá dia 13 di mei 2018 na Octagon Plaza na Avila Beach Hotel.

Ta bon pa nos menshoná ku Randal Corsen i Dibo Doran tin vários proyekto ku nan a hasi huntu kaba den e añanan tras di lomba, e kolaborashon entre Dibo I Randal a kuminsá na 2016, kaminda Randal a invite, Dibo pa forma parti di su Big Band, den e konsierto di selebrashon di 100 aña di MCB. Despues di esaki a sigi varios projekto den kua Randal a invitá Dibo partisipá, manera Tribute to Al Jarreau, Thxgiving concert, Salsa De Los Bravos, Paranda di Fin di Aña, I tambe Dibo ta forma parti di Randal Corsen Orchestra. Dibo di su banda a invita Randal komo areglista di e piesa debutante di su agrupashon musikal One, I pa ta su direktor musikal I areglista durante festival di tumba 2018.

Pa e okashon aki Randal a forma un grupo ku ta konsisti di algun di su musikonan di primera ora, ku ta musikonan di taya manera Pernell Saturnino, Eric Calmes I Lonte Conradus. Pa kompletá e grupo I komo “chèri riba e bolo”, nan lo ta kompañá pa Antillean String Quartet, pa duna e muzik un toke speshal; pues ta algu masha interesante pa mira i skucha!

E konsierto aki ta konta ku presentashon algun invitado speshal ku sigur lo hala masha atenshon. Un di e invitadonan speshal ta Grupo Serenada, ku tin mas ku 40 aña ta deleitá nos pueblo ku muzik florklóriko I popular di Kòrsou, den nan kombinashon remarkabel di harmonisashon vokal i instrumentnan I rítmonan típiko di nos isla. Bou direkshon di e direktor musikal Henri Moen; Serenada lo presentá no solamente algun ‘highlights’ di nan repertorio, pero tambe nan lo bai presentá den kombinashon ku Dibo I Randal.

Otro di E invitadonan speshal riba e anochi aki lo ta e popular kantante/kompositor di diferente kansionan popular i hitnan klasiko lokal Gilbert "Gibi" Doran, kende tin un trayektoria largu i eksitoso tantu riba su mes komo su agrupashon musikal Gio Fuertisimo. Gibi ta e kompositor lokal ku tin mas komposishon riba su nòmber. despues ku e tabata den eksterior relashona ku su salú e no a duna ningun presentashon pa pueblo di Kòrsou, Gibi Doran lo paresé bèk riba esenario den E Konsierto aki dia di mama. Ta promé bes ku lo mira Gibi Doran, Randal Corsen i Dibo Doran huntu riba esenario den e formashon aki, Gibi lo bolbe topa bèk ku su grupo di pasado ku ta Grupo serenada den kual tambe ela militá.

E legendario Oswin Chin Behilia tambe lo ta un di e invitadonan speshal durante e konsierto: ‘Mama pa Semper’. Oswin Chin Behilia, konsiderá komo un di e kantante/kompositornan mas destaká di Kòrsou, lo presentá algun di su piesanan mas popular, kompañá pa Randal I su músikonan. Chin Behilia a yega di presentá na mas okashon komo invitado speshal den proyektonan di Randal, manera na aña 2004 durante Noth Sea Jazz Festival na Hulanda, I na 2008 den sala grandi di Concertgebouw na Amsterdam ku Randal corsen & Friends. Despues di vários aña nan lo bai topa otro atrobe riba tarima, I na e okashon aki Dibo tambe lo djòin, kantando piesa den duo ku Chin.

Orario: Porta ta habri 6 di atardi. I E Concert Show lo kuminsá 7:00 di anochi en punto! “Mama Pa Semper” dia 13 di mei 2018 ta tuma luga na Octagon Plaza na Avila Beach Hotel!

Tradishon di Konsiertonan na Avila ta ku e evento ta kuminsá na ora, pues tur hende bin tempran pa no pèrdè nada di e ConcertShow aki. Karchinan ta optenibel na: Avila Beach hotel, Mensings Caminada, 24uur uit de muur (pomp sta maria), Beep Beep (Rio Canario)

Early Birds lo ta 50 florin i entrada general ta : 55 florin.

#NEWS

Featured News
Recent News
Archive
Search By Tags