Farándula sufriendo di síndrome di plaka brutu?
Vários ta e bandanan ku ta sufri bou di e ‘síndrome di plaka’ ku aktualmente ta dominando farándula. Kantantenan ta bandoná un agrupashon musikal ku a pone fe den nan, pa di ayabanda firma pa outo i pa un bónus di 5,000 florin. Tin di nan ta firma akuerdo ku den farándula lokal ta nunka bisto- 8 página estilo mayor league baseball- ku un ‘entrance fee’ di entre 30,000 pa 100,000 florin.
Farándula na Kòrsou, a stòp di move riba talento i awor ta moviendo riba florin. Ántes ta integrá den un banda, pa fanátiko i prestigio, awendia esei a kambia pa sèn i ko’i kareda. Di akuerdo of no, esaki ta e farándula den 2018, i tin hende ta hasta bisa ku semper e tabata asina, numa e tabata un poko mas skondí i nuansá. Awòki, no ta importá ken haña sá, aunke ku ninga te final....
Tin bes ta mihó pa kosnan ta ‘bedaar’ ya belasting kantor no ta kana bo tras. Tene kuenta ku tur kantante mester paga impuesto riba tur entrada. Eksakto, hasta riba e bónus of e ‘transition/ entrance fee’. Of ta ku 'bitcoin' ta paga nan ?!
Konsiderá ku esaki ta un desaroyo positivo pa nos ekonomia, e sèn ta lora. Pero di otro banda, agrupashonnan musikal ku semper a 'drei' riba talento, inspirashon i kreashon di kantante i músikonan nobo awe ta 'sangra' i ta mira sobrebibensia masha skur. Un smak amargo, un pulchi difísil pa traga pa doño di bandanan afektá. Farándula lokal sufriendo di síndrome di plaka brutu i tin algun banda ku ta na 'awa di bida..'.
