Nastyplay pa largu! Lo añadí algun kara nobo na e frònt
“Pa kuminsá mi ke aklará e parti esensial ku tur fanátiko tin gana di sá. Nastyplay ta eksistí ainda i lo no stòp di eksistí. No ta un sekreto ku tin algun integrante ku a bandoná Hulanda i a skohe pa sigui nan bida na Kòrsou. Esei sigur ta un desishon ku kada hende ta tuma personal i nos komo un famia, ku semper a para tras di otro, nunka lo kuestioná desishonnan asina. Al kontrario nos ta apoyá kada hende den siguiente stapnan di nan bida”, esaki tabata e promé reakshon i deklarashon di Jamilson ‘Jamz’ Janzen, roadmanager, músiko i tambe kompositor di Nastyplay. TRENDSZ a kombersá kuné relashoná ku Nastyplay despues ku a bira konosí ku algun músiko a skohe pa un otro rumbo i a forma otro agrupashon musikal na Kòrsou yamá Bello Vie.
“Nastyplay a risibí e aseptashon di fanátiko i públiko no solamente pa nos manera úniko di toka, pero tambe e union ku a sòru pa amigu i koleganan bira manera ruman i esaki bo por mir’é tantu riba ‘stage’, komo den nos bida personal”, ‘Jamz’ a sigui splika.
Mas aleu el a duna di konosé ku e union ku tabatin, semper lo keda, apesar di kon leu nan ta for di otro. Aktualmente Nastyplay ta den un periodo ketu, paso a skohe pa duna nan fanátikonan, mesun nivel ku nan a kustumá kuné. Esaki refiriendo segun e lider, na e manera di toka apart, unda ku semper lo bai keda trese inovashon den dje. Ademas, tur kara ku a kustumá kuné, kende nan ta establesé na Hulanda, ainda ta formando parti di e banda.
“Lokual ku si fanátikonan por spera, ta algun kara nobo, ku lo por forma parti di e famia ‘Nasty’. E frònt aktual di esnan ku a keda ta TSeaN i Matt Bonilla. Nos mes lo divulgá e kara nobo nan despues. Loke si mi por bisa ta ku un di e karanan nobo, ya a yega di ft. ku Nastyplay. Te einan mi por duna bo”, Janzen a duna di konosé di forma poko chistoso.
“Nastyplay ta den studio di grabashon semper, pues spera un ora pa otro, produkshonnan nobo. Pa finalisá mi kier yama TRENDSZ danki pa sigui nos di aserka i danki pa e aserkamentu, pa kita tur duda i rumornan ku ta koriendo. #TurHendeGustaNasty”, Jamilson a finalisá bisando.
