Gentz ta aklará e rumornan riba un posibel stòp


Tim di maneho di agrupashon musikal Gentz Tre’chic a tuma nota den diferente medio di komunikashon i riba retnan sosial ku tin rumor ta kore riba un posibel disolvashon di Gentz. Nos kier aklará ku na e momentunan aki nos enfóke ta riba nos produkshonnan nobo ku lo sali pronto i riba tur nos kompromisonan ku manera semper nos a i lo sigui kumpli kuné komo Gentz.

Otro siman Gentz lo ta na Aruba ku un fiesta praktikamente sold out. Sigui pa un presentashon den WTC kompañando T-sean. Den luna di yüni Gentz ta na Hulanda ku tambe ta premira di bira un fiesta sold out. Pa luna di yüli Gentz lo bolbe Hulanda pa zomerkarnaval i siguiendo pa luna di ougùstùs kaminda nos lo biaha pa Belgika pa 2 presentashon fenomenal na e festival ku mas di 10.000 bishitante kual ta Antilliaanse Feesten na Antwerpen.

Pues apesar di tantu rumor i spekulashon den e mundu farandulero, Gentz ta moviendo ketu bai i nos ta i lo sigui demostrá e vishon ku nos tin. Gentz ta para pa kalidat musikal i profeshonalismo i esaki nos lo sigui brinda pa asinei sigui engrandesé, kontribuí i entretené e mundu di músika lokal.

Un kos ku sí nos por bisa, manera Ray Lauffer a kanta na festival di tumba; “Uní nos ta Fuerte, Dividi nos lo ta Perdí”.

#NEWS #CURACAO

Featured News
Recent News
Archive
Search By Tags