Radio ‘Magic FM’ selebrando 20 aña di eksistensia na Aruba


Radio Magic FM, ku ta un radio-emisora di Aruba, riba frekuensia 96.5 FM, ta kumpli 20 aña di eksistensia riba dia 25 aprel 2018. Ta trata aki di radio situá na Palm Beach, ku ta wòrdu manehá pa Erin Croes.

Relashoná ku e grandioso selebrashon aki, TRENDSZ a hiba un kombersashon ekstenso ku Erin, tokando basta tema importante pa ku e historia di 20 aña di e radio, i ta wòrdu konsiderá un di esnan mas skuchá riba e isla di Aruba.

Tabata riba 25 aprel 1998, ku ofisialmente por a anunsiá ku tin un Radio stashon nobo a nase na e isla di Aruba. Esaki ta un fecha speshal pa Erin Croes, kende a mira su soño bira realidat di por tin su propio stashon di radio, "On Air".

Durante di e kombersashon, Erin a deklará lo siguiente:

“20 aña pasá ora ku MAGIC FM a bai den aire ofisialmente, tur hende a pensa ku lo ta djis un radio mas, pero a sorprendé i kontagiá tur hende for di promé dia ku su vibrashon energétiko te ku e dia di awe”.

Un logro grandi i spesial

Sigur ta un logro ku a bira realidat danki na su perseveransia i pashon pa loke semper e la kere den dje. Mester bisa ku ounke no fásil, pero despues di 20 aña, por bisa ku e emisora a sa di mantené su sintonia i popularidat pa e último 20 añanan.

Erin Croes, semper a kere den e evolushon i den teknologia i a pèrkurá pa su radio tambe sigui ku e inovashon aki invirtiendo konstantemente den keda 'up to date'.

Meta di Magic

Erin ketu bai na palabra a sigui splika lo siguiente: "Ora mi a start ku Magic, mi tabata kier pa Aruba tin un radio ku por para banda di kualkier standard internashonal i ku nunka nos por keda chikí òf bou di nivel, kompará ku radionan internashonal.

Nos tin un tarea hopi special pa Motivá, Entretené i Informá nos oudiensia i ku e amor ei nos ta laborá tur dia sin eksepshon. Kada dia ta un regalo di nos Kreador, pues nos mester bib’é intensamente", el a duna di konosé. Mas ku tur kos, e propietario kier gradisí su koleganan, ‘E team’ manera e ta yama nan, ku semper ta apoy’é. Magic ta un radio ku semper a pone rèspèt, amor pa hende, informashon verídiko i valioso, positivismo i alegria na promé lugá. Rèspèt pa nos kultura i tradishonnan. Amor pa nos isla i su hendenan”, Erin a konkluí bisando.

#NEWS #ARUBA

Featured News
Recent News
Archive
Search By Tags