Jazz Meets Cultures dia 23 di yüni próksimo


Jazz Meets Cultures ta nòmber di un konsepto úniko kaminda ku e músika Jazz ta topa kultura; ku esaki ta referí na nos géneronan lokal manera Tumba, Seú, Simadan, Tambú, Kizomba, Reggae, Ritmo Kombiná, Zouk i Son Montuno huntu ku e integrashon di Jazz. E konsepto aki ta keda tresé dilanti den forma di un konsierto ku e meta pa rekoudá fondo pa por yuda nos hobennan ku desaroyo di nan talento den músika i baile. Na 2011 tabata e promé edishon di Jazz Meets Cultures, kua e tempu ei a tuma lugá na Landhuis Groot Sta. Martha i mester remarká ku tabata un éksito rotundo. Dia 23 di yüni próksimo ta dia di e di dos edishon di Jazz Meets Cultures na Landhuis Brievengat di 8or pa 11or di anochi. Ta e intenshon pa e evento aki bira unu anual den luna di yüni.

Jazz Meets Cultures 2018 lo konta ku presentashon di solamente nos artistanan lokal, dunando realse na nos yunan di tera. Dennis Aalse i su Big Band lo kompañá mayoria kantante. Esnan ku lo presentá e dia aki ta: Mc Chris Strick, Reinier Lijfrock, Grupo Kompèr, Grupo Trinchera, Æmy Felicia, Andrew Aalse, Grupo Rítmiko Sablika, Rendell Rosalia, Rachid Felida, Furgell Wijngaarden, Aisha Lucas ku Uprising Reggae Band, Djuric Virginie, Raynor “Ray” Lauffer, Amos Balentin, Roald Balentien i Urvin “Luwi” Jano.

Karchi di entrada ta optenibel na rason di solamente fl. 55,- na 24 Uur Uit de Muur, Beep Beep i Mensing’s. Karchi pa sekshon di VIP ta optenibel serka Anaiz Visser na 513-2841 pa fl. 175,-. Djasabra 5 di mei lo tin un gimmick pa e evento aki, kua lo keda anunsiá otro siman. Tambe lo por kumpra karchi online via di Ticket Caribbean. Pa kualke informashon di Jazz Meets Cultures 2018, por chèk su página di Facebook i tambe Instagram, bou di e nòmber JazzMeetsCultures.

#NEWS #CURACAO

Related Posts

See All
Featured News
Recent News
Archive
Search By Tags