Alex su focus ta riba su estudio, ounke tin numeroso oferta


TRENDSZ a hiba kombersashon ku Alex (Edilio) Acosta, ku ta un studiante i alabes músiko i kantante arubano, kende ta establesé na Hulanda.

E kombersashon tabata pa asina tende kiko ta su moveshonnan pa loke ta farándula i metanan pa futuro. Riba esaki Alex, kende tambe tabata parti di agrupashon musikal, Cache, a kontestá di e siguiente manera: “Mi tin intenshon pa pronto mi mes kuminsá produsí algun piesa aki na Hulanda. Esaki ku e intenshon pa bai lansa mi mes komo un kantante solista. Banda di esaki, tin tambe diferente oferta riba mesa, pa asina mi djòin bandanan ku tin na Hulanda. Ainda mi no a disidí nada i si mi djòin unu di nan, esaki lo ta un sorpresa.

Mi ta studiando tambe, unda mi tabata hasiendo un estudio nivel HBO. Primeramente tur kos tabata kana hopi bon, pero mi periodo di stazje, no a bai muchu bon, ku a pone ku mi mester a duna mas i hinka mas tempu i asina a kambia mi focus di músika pa skol. Esaki a bira un periodo ku mi no tabatin muchu tempu, pero na mes momentu mi tin ku konfirmá ku ta un periodo ku mi a siña hopi di dje”, Alex a splika.

Mas aleu e hóben arubano a duna di konosé di e inisiá ku músika for di chikí, na skol den klas 2, unda e la inisiá ku lès di kuarta. Seguidamente tambe e la sigui lèsnan di bas i kitara. Miéntras ku finalmente e la siña toka piano tambe i a bai lès di kantamentu na Kas di Kultura na Aruba mes.

“Tambe mi tabata toka drùm na misa, i asina a bai toka den un banda. Despues mi mes a lanta “The New Climaxxx’, unda mi mes tabata toka ‘keyboard’ tambe.

Durante di e periodo di aña 2012 te ku 2014, mi a forma parti di Upgrade Music, komo kantante, pa seguidamente, move pa tera friu na aña 2014. Despues di tabata 2 aña na Hulanda, mi a pasa pa forma parti di Cache”, Alex a deklará. Den Cache Royal Alex a kanta “Na mi bo kurason”. TRENDSZ ta deseá Alex hopi éksito!

#NEWS #INTERVIEW

Related Posts

See All
Featured News
Recent News
Archive
Search By Tags