Tsunami di Aruba ku piesa i videoclip nobo
E popular agrupashon musikal di Aruba, Tsunami ta den studio grabashon aktualmente. Esaki pa asina pronto saka un piesa nobo, kompañá pa su videoclip. Ta trata aki di komposishon di Aimee Silvanie i Joänne Martina di ‘Deeptexture Composer’, miéntras ku e areglo ta na enkargo di Quincy ‘Biggie Smalls’ Comenencia.
E trio aki, mes ta esnan ku aña pasá a kompositá i areglá pa e propio agrupashon musikal Tsunami, unda tabata Mitch Almary, kende a interpretá e kansion titulá "Djis un ratu".
Miéntras tantu e biaha aki, ‘Maya’ Marin, e dama di Tsunami, lo interpretá e kansion nobo. Ta trata di kansion, ku lo hiba di titulo: "Nog Steeds".
‘Maya’, ta e kantante femenino di e agrupashon Tsunami, kende por wòrdu kòrdá pa e kansion ku a sa di gosa di un popularidat grandi na Kòrsou, “Asina Asina”, ku e propio Tsunami.
Mas aleu, TRENDSZ, a keda informá tambe ku pa loke ta aña 2018, ku e agrupashon aki, ta pendiente pa saka por lo ménos 4 pa 5 piesa mas. Pues fanátiko- i amantenan di bon músika i ambiente, mester ta pendiente pa pronto skucha, gosa i baila kosnan nobo di Tsunami.
