Ir-Sais pendiente pa lansa 'Kiko Ta Kiko'
Ir-Sais su ‘sabor’ ya ta ampliamente konosí. Próksimamente lo lansa e piesa titulá ‘Kiko Ta Kiko’. TRENDSZ a risibí un ‘exclusive release’, pero entretantu e piesa por wòrdu solisitá na tur radio. Ir-Sais resientemente tabata den notisia na Ulanda, relashoná ku e re-mix ku Ronnie Flex a hasi di su track ‘Dream Girl’. E kantante Boneriano ta sigui kosecha éksito na Europa i por lo pronto esaki lo keda asina ya ku e género musikal ku Ir-Sais ta dominá den forma fantástiko ta den demanda haltu na e.o Ulanda. Kizomba, Zouk i otro género musikal tropikal semper a hala hopi atenshon na Ulanda. Ir-Sais tin un dominio tremendo di tantu zouk i kizomba ku ta hasi ku su popularidat tin únikamente oportunidat di sigui krese. Éksito Iri!
