E promé di ‘Bello Vie’ ta na kaminda: "Porfin mi ta mi só"
‘Bello Vie’ ta e agrupashon musikal ku ta konsistí di diferente músiko bon konosí i popular. Ta trata aki di mayoria èks músiko di ‘Nastyplay’, kende a bin residensia bèk na Kòrsou. ‘Bello Vie’ ta nifiká 'Un bunita bida'. E frònt ta formá pa kantantenan Chris ‘Cizzle’ Van Thiel, Tyzik ‘Ziko’ Lispier i tambe Rashid ‘Ori’ Frans.
E plannan di e agrupashon musikal aki ta grandi. TRENDSZ por a komprondé ku preparashonnan ta bayendo super bon. ‘Bello Vie’ a kuminsá traha riba nan piesanan nobo i ya kaba tin grabashon tumando lugá. ‘Bello Vie’ tin dos piesa klá, inkluso ya a kuminsá ku parti di grabashon di un videoclip huntu ku ‘Ganja-Inc Productions’. Fanátikonan, baidónan di fiesta i amantenan di bon ambiente i músika, por kuminsá prepará pa e promé piesa di ‘Bello Vie’, ku dentro di poko lo keda estrená. E piesa "Porfin mi ta mi so", lo wòrdu kantá pa ‘Cizzle’ i produsí pa Derrel de Palm, Raeve ‘Palo’ Rog i hinter e tim di ‘Bello Vie’.
Hopi ta puntrando ki dia e agrupashon lo ranka sali ofisialmente, pero di parti e agrupashon musikal ainda no a pone un fecha. Esaki debí ku e organisashon mes ta enkargá ku nan parti finansiero pa yega na materialnan nesesario i tambe ke pa tur kos ta reglá i zona perfekto, pa ora hasi nan debut. Di parti di TRENDSZ, nos ta deseá hinter “Team Bello Vie”, hopi éksito, i nos tambe ta keda pendiente, manera tur otro, pa skucha ‘Bello Vie’ pronto!
