Fenty Music huntu ku Ritmo Real ku piesa i videoclip nobo
Algun siman pasá a yega na TRENDSZ su konosementu, ku na isla ruman Boneiru, tin moveshonnan interesante tumando lugá.
Ta trata aki di moveshonnan den agrupashon musikal 'Fenty Music', un di e agrupashon musikal, ku a bin ta gosa di un popularidat enorme na Boneiru mes, i tambe na Aruba, Kòrsou i Hulanda, konkistando kurason di fanátikonan di farándula i tambe di bon ambiente. Awe, frònt di Fenty Music ta konsistí di Gerald Alberto, Danny Janga i Capella Chirino. i nan ta den studio di grabashon i ta pendiente pa estrená nan promé kansion promoshonal, pa e temporada aki.
Lo bira un piesa interpretá pa Gerald Alberto, kual ta un komposishon i areglo di e duo formá pa Faysel 'Kabala' Francisco, kende ta e direktor musikal i alabes e basista di e banda i tambe Derrel 'Titi' De Palm, kende no mester di ningun introdukshon. Mas aleu, loke sigur lo bai ta e chèri riba e bolo i ku TRENDSZ, den búskeda pa duna bo tur detaye i informashon, manera mester ta, a bin haña sá ku e piesa lo no wòrdu kantá pa Gerald só. Gerald lo bai ft un artista di Urban, direktamente for di Aruba ta trata di ku Ritmo Real. Nos por bisa ku ya TRENDSZ a tende parti di e piesa nobo aki i por konfirmá ku e piesa ta primintí di lo por bai bira un hit sigur pa e agrupashon. Nos a komprondé ku ta e intenshon pa esaki keda lansá huntu ku su videoclip, ku tambe ya ta kla, durante di e último dianan di luna di mei 2018.
