Jouly: Mi no ta un muhé pa loko...
TRENDSZ a hiba un kombersashon ku Jouly Bridgewater. Ta trata aki di un kantante yu di Kòrsou, i ta kosechando éksito aktualmente ku su piesa ‘Muhé pa loko’
Jouly ta konta TRENDSZ ku aktualmente e ta ‘freelance singer’, kende ta kanta ‘Entertainment’, na diferente sitio aki na Kòrsou. “Por ehèmpel mi ta kanta na Sta Barbara Resort i tambe na Madero na Mambo. Esaki mi ta hasiendo sigur, ya pa 7 aña kaba. Promé ku esakinan, tambe mi a yega di militá den e banda di hóbennan, ku e tempu ei, tabata yama “D-One”, Jouly Brigdewater a splika introdusiendo su mes.
“Aworakí mi a kaba di graba un kansion ku “Loading Band”. Ta asina ku mi sa presentá huntu ku “Loading Band” tambe i mi a wòrdu aserká pa nan mes, pa graba e piesa, ku ta hiba di título ‘Muhé pa loko’’, e la sigui splika. Durante di e kombersashon ku TRENDSZ, a bin sali na kla, ku ta trata aki di un kansion, skirbi pa Ephrem J. i produsí pa Url Isenia, ku kompañamentu musikal di ‘Loading Band’.
“Tabata un ‘great’ eksperensia, pa hasi esaki i sigur mirando ku e piesa a haña un akohida hopi grandi. Mi ta sumamente agradesido pa esaki. E piesa ta papia pa su mes! E título ta apart, paso si bo no a skucha e piesa ainda i bo mira òf tende djis e título, e ta hasi bo mas kurioso pa sá kiko e piesa su kontenido ta. Mas ku klaro mi tin mas plan pa futuro pa ku mi karera, pero esakinan, mi ta preferá di no menshoná ainda.Tanten tur ku ta sigui TRENDSZ, por sigui disfrutá i pidi pa ‘Muhé pa loko’, na tur radio-emisora”. Nos ta gradisí Jouly pa e kombersashon ameno i ta dese’é hopi éksito! Jouly ta otro artista tremendo di Kòrsou.
