Ataniro kemen: Laga nan sapatiá...


“Laga nan sapatiá” ta título di un piesa nobo, ku otro siman lo sali kaya, huntu ku su videoclip. Ta trata aki di un piesa, den bos di diferente gigante den músika. E trio formá pa Janiro ‘Ataniro’ Eisden, ‘Rich Kalash’ i tambe Zyon, kende nan a uni pa trese loke ya ta pinta di bira un bòm musikal riba merkado.

Despues di a traha riba e piesa i a finalisá e grabashon, tabata ayera, djamars dia 5 di yüni 2018, ku e artistanan aki, a hasi grabashon di e clip, ku entrante e siman benidero, un i tur por gosa di dje. Tabata un grabashon ku a tuma lugá na Aruba. E arubano ‘Ataniro’, kende no mester di ningun introdukshon, ta konosí pa entre otro su hitnan ‘Suave’ i tambe ‘Palo’, unda e ta ft. su paisano Zyon. Miéntras ku e ídolo den músika Urban, e YDK ‘Rich Kalash’, ta konosí pa entre otro ‘Kas den mondi’ i tambe ‘Ku mi Dios’.

TRENDSZ a hiba un kombersashon ku ‘Ataniro’, kende ampliamente a duna un splikashon kon tur kos a inisiá, te ku awor, ku kosnan ta kasi klá, pa pueblo konosí ku e piesa i videoclip, titulá “Laga nan sapatiá”.

Di akuerdo ku e legendario Ataniro, “E idea a bini durante di un kompetensia, unda tabatin un ‘battle’ di barbero, durante di un Expo na Aruba. Durante di e evento aki, ‘Rich Kalash’ a hasi su presentashon. Na final di su presentashon nos a papia, unda e la bin riba e idea pa nos hasi algu huntu. Mirando ku tabata un tremendo idea, trabounan a inisiá mesora i mi aserká e produktor Young Twista, ku tabatin un ‘beat’ riba instagram, ku mi a kumpra serka dje. Mi ta gusta traha ku diferente produktor, p’asina nos tin diferente sabor.

Mi a traha mesora riba e konsepto ‘Laga nan sapatiá’, i a grab’é huntu ku Zyon i mand’é kla pa Rich, paso mi sa ku Rich ta basta okupá i asina lo ta mas fásil. Seguidamente Rich a hasi e grabashon i nos a plania e videoclip huntu ku Ken Wolff, ku finalmente a hasi e grabashon di e clip, ku atrobe ta un konsepto otro, manera ‘Ataniro’ ta konosí p’e”

Miéntras ku riba e pregunta, for di unda e idea a sali, ‘Ataniro’ a splika TRENDSZ, lo siguiente.

“Esaki ta un konsepto ku ta dediká na hendenan, ku no kier wak bo bai dilanti i tampoko no por ku bo logronan. Ta hendenan ku no ta atmirá i biba ku bo den bo gloria. Mi ta kere no ta na Aruba só, sino na Kòrsou i tur parti -tambe tin hopi. Nan no ta buska pa nan mes bai dilanti, i ta punta dede riba bo, pa trata na demotivá bo. Pero ku esaki nan no ta logra, stroba i tampoko hasi influensia. Aki un siman e clip lo bin kaya i mi ta spera un i tur por gosa di dje”, ‘Legend Ataniro’, kende a bira konosí ku ‘Basic One’, a finalisá bisando na TRENDSZ. Nos ta keda pendiente pa e videoclip! Hopi éksito na tur tres artista.

#NEWS #NEWRELEASE #ARUBA #CURACAO #URBAN #VIDEOCLIP #INTERVIEW #LOCAL

Featured News
Recent News
Archive
Search By Tags