JEON a presentá den konsierto exclusivo pa Renaissance Aruba


Tabata diamars ultimo cu Renaissance Aruba Resort & Casino a celebra otro edicion di Global Day Of Discovery y a haci esaki cu un concierto acustico na su infinity pool cu presentacion di cantante/ musico Jonathan Thiel. JEON no tin mester di niun introduccion, e’la conoce fama mundial na un edad relativamente hoben, despues di e colaboracion ‘Machika’ cu J Balvin y Anitta.

Esaki ta e di 7 aña consecutivo cu hotelnan di Renaissance ta celebra un dia riba cual ta laga e huesped cera conoci cu tur loke e mercado ta ofrece. Tur 160 hotel di Renaissance na mas cu 40 pais ta dedica un dia special na inspira descubrimento, esaki dor di organisa eventonan exclusivo paden- of pafo di e propiedad y ta incorpora mixologia, gastronomia y entretenimento den e programa. E aña aki a presenta JEON!

Specialmente pa Global Day Of Discovery 2018, expertonan a crea un ‘Machika Punch’. E bebida cu ta inclui, JEON su propio Rum ‘Crioyo’, Vodka, Coecoei, ijscream di coco, juice di anasa, juice di cadushi y algun ingrediente netamente Arubano mas, a keda reparti durante di e concierto. Minister di Turismo, Salubridad Publico y Deporte, sr. Dangui Oduber tambe a presencia e concierto diamars ultimo. Janien Huistra, Director di Benta y Mercadeo ta conta cu a reina hopi entusiasmo anticipando e presentacion di JEON. “Tur aña nos a introduci nos guestnan na sabor, ritmo y artistanan autentico Arubano. E aña aki, e concierto di JEON a surpasa tur expectativa y sigur por wordo considera un di e miho celebracionnan di Global Day Of Discovery”.

JEON, cu actualmente ta riba un gira na Merca hunto cu J Balvin a traha tempo den su schedule pa e concierto di diamars ultimo. ‘Machika’ a bira un hit mundial, un composicion original di JEON, cu ta conta tambe cu presentacion di artista Brasilero Anitta. Nos region y islanan ABC ya a conoce no menos cu dies produccion #1, miyones di views riba YouTube y a premia JEON na diferente ocasion den transcurso di añanan. E concierto cu a keda transmiti ‘live’ via Magic FM a percura pa no unicamente esunnan sinta na Renaissance Aruba disfruta, sino tambe henter comunidad. Un gradicimento special na Larissa Bermudez cu tabata MC pa e evento y Elite Productions cu un biaha mas a percura pa un tremendo set-up.

#ARUBA #NEWS #EVENTS #REAGGETON #URBAN

Featured News
Recent News
Archive
Search By Tags