Loui G, di ReQuest awor pa Nastyplay


Farándula, ketu bai ta konosiendo mas i mas moveshonnan ku ta tumando lugá, tantu aki na Kòrsou, Aruba, Boneiru i tambe na Hulanda. Algun luna atras, TRENDSZ a hiba un kòmbersashon ku road manager di e agrupashon musikal di Hulanda, Nastyplay. Ta trata aki di Jamilson "Jamz" Janzen. Esaki riba desaroyonan rondó di e agrupashon musikal. Manera ta ampliamente konosí, e banda a pèrdè algun músiko i kantante, i esaki mes a pone ku nan tabata den búskeda di personanan ku lo por yena buraku nan ku a keda habrí. Na e momentu ku TRENDSZ a tene un kòmbersashon ku "Jamz" e no kier a bai den muchu detaye relashoná ku e posibel stapnan ku e team di Nastyplay lo a bai tuma.

Pero awe despues di algun luna, kos nan a sigui desaroyá, te ku awor TRENDSZ por informá bo ku, Nastyplay tin su promé kara nobo pa loke ta trata nan frònt.

Den transkurso di dia, nos a haña e informashon, ku ya a keda konfirmá, ku e kantante Luelvis "Lui G" Petronielia a pasa pa forma parti ofisialmente di e famia di Nastyplay. Den un kòmbersashon breve ku "Jamz", el a konfirmá esaki pa TRENDSZ, i a deklará lo siguiente: "Nos ta bezig den silensio, i tiki tiki kaya lo sa tur kos".. Sin hansha sin problema Manera mi a bisa semper, nos no ta bringa den e farándula aki sigur ku no. Talento tin hopi, pero e dedikashon ku vishon ta bin na promé lugá. Luelvis “Loui G” Petronielia, ta un hóben talentoso i ku gana di traha. E’l wòrdu di scout ku su 17 aña dor di e team di Nastyplay. E temporada ei e tabata biba na Kòrsou, i ora e la bai biba Hulanda el a forma parti di ReQuest. I awor e ke sigui desaroyá su talento. Despues di kòmbersashon nan sano di ámbos banda, e la skohe pa forma parti di e famia Nastyplay.

“E ta e promé, kisas lo tin mas”. Tabata palabra nan, di road manager di Nastyplay, Jamilson "Jamz" Janzen kende a deklará pa TRENDSZ. Awor e frònt ta konsistí, te na e momentu nan aki, pa "Tsean", "Matt Bonilla", i “Loui G”. Nos ta deseánan tur klase di éksito pa futuro, i ta sperá riba e kosnan nobo ku lo subi kaya pronto.

#NEWS #CURACAO #RITMO #INTERVIEW

Featured News
Recent News
Archive
Search By Tags