Devi Dev markando pasonan firme
“Mi a kuminsá rèp den bario huntu ku algun brò, kende si tabata rèp i graba kaba i a siña hopi kos di nan. Tambe for di mi primu, mi a siña hopi. Un tempu e la kuminsá move duru i a inspirá mi pa mi tambe kuminsá graba i saka mi kosnan riba kaya. Despues, mi a kuminsá graba clip i asina a kuminsá bira konosí na islanan ABC i a sigui ku esaki komo mi trabou”, asina e artista konosí komo ‘Devi Dev’, kende ta un Yu di Kòrsou, establesé na Hulanda, a duna di konosé na TRENDSZ.
E artista di músika Urban, ku ta interpretá entre otro e kansion di momentu “Pleita”, a hasi un bishita sorpresa na kas serka ‘Diva Roos’, unda a hiba un kombersashon ameno, riba entre otro kon e la inisiá, ta moviendo i tambe su plannan pa futuro.
Mas aleu ‘Devi Dev’, a splika di ta na Kòrsou, pa algun presentashon i grabashon di piesa nobo, unda tambe e ta grabando dos diferente clip. Entre esakinan tin unu ku ‘Jaido’, kende tambe ta konosí den e mundu di Urban, i ta interpretá e hitnan ‘Speed’ i tambe ‘Bati pa mi’, huntu ku Buleria di Aruba.
“Mi ta pendiente pa lansa yen kos nobo, pero ainda no sa den ki sekuensia. Esun ku si promé lo bai kaya ta hiba di título “Kansa mi”. Tambe lo mi bai lansa ‘EP’ i tin basta clip ku tambe lo bin ‘online’ próksimamente. Pa futuro mi ta pendiente pa algun kos ku Enmeris, miéntras ku tambe lo mi tin ft ku ‘Dayo’ i ku ‘Rich Kalash’. Mi tin tambe basta kos ‘rabiá’ ku lo mi saka ku ‘T-sean’ i ‘Tru-G’ i ta pendiente pa un òf mas proyekto, ku den futuro ora nan kristalisá lo mi ke papia di nan”, ‘Devi Dev’ a kontinuá bisando.
Riba pregunta di TRENDSZ, ku si su hit di momentu ‘Pleita’ ta un inspirashon propio, e artista di Urban a deklará lo siguiente: “Si, ‘Pleita’ ta un eksperensia personal. Mi a traha riba e kontenido, unda mi tabatin hopi kos pa splika i asta por a hasi e kansion muchu mas largu mes. E tabata asta un sapatu ku a pas hopi otro. Tabatin hende ku a bisa mi ku mi a wak den nan kas, paso nan tambe pasa den e kosnan ei”.
Devi Dev a finalisá su entrevista ku un mensahe pa e hóben lektor di TRENDSZ, “Mi ta spera ku kada unu lo sigui e kaminda mas mihó pa nan mes i ku maske kiko pasa, pa bo keda semper bo mes. Traha duru semper i resultado ta bin di mes !”
Nos ta deseá Devi Dev, hopi éksito i ta keda pendiente pa mas kos bon den e luna(nan) benidero!
