Piesa nobo pa Buleria ‘Djis un biaha mas’


Despues di kasi 10 aña Dwight Leoneta ta bolbe graba

Agrupashon musikal Buleria, a lansá otro piesa nobo, riba merkado. Ta trata di e kansion titulá "Djis un biaha mas". Loke ta hasi e piesa aki apart, ta ku e propio músiko, alabes direktor musikal di Buleria, Dwight Leoneta ta e kantante.

TRENDSZ a tuma nota ku ta despues di kasi 10 aña, ku Leoneta a disidí di drenta studio di grabashon e mes atrobe. Ku esaki tambe e ta komplasé su propio fanátikonan i tambe esnan di Buleria. Pues Dwight a kompositá, areglá i kanta un piesa pa nan.

E último biaha ku Dwight a hasi esaki, tabata na aña 2008, pa ta mas eksakto den luna di novèmber, pues 9 aña i 8 luna pasá. E temporada ei, huntu ku agrupashon musikal Cache Deluxe, Dwight a lansa un piesa titulá “Imposibel”.

Dwight no únikamente ta konosí komo kantante di e dos piesanan aki, sino ken no ta kòrda tambe piesanan manera entre otro, "Zeta riba awa", "Links paden" i “24/7”, ku tabata hitnan grandi ku Dwight a yegá di interpretá den pasado.

Miéntras tantu e último siman di luna di yüni 2018, a inisiá ku lansamentu di su piesa nobo, unda e reakshonnan ta super positivo. Banda di esaki tambe poko sorpresivo pa esnan kende ku kisas a pensa, ku Dwight simplemente ta un tremendo kompositor i por dominá e bas ku dushi sabor. Pero e ta tambe un tremendo kantante.

TRENDSZ ta deseá Dwight Leoneta i e tim di Buleria, tur klase di éksito ku e kansion aki, sperando ku ya pa e fin di siman aki mes, un i tur por baila e piesa nobo, na momentu ku Buleria lo ta na Kòrsou, pa un presentashon, ku Gentz, kaminda tur dos lo ta selebrando nan aniversario den W.T.C.

#CURACAO #ARUBA #LOCAL #RITMO #NEWRELEASE #NEWS

Related Posts

See All
Featured News
Recent News
Archive
Search By Tags