‘DJ Menasa’ huntu ku ‘MC Don T’ den festival na Bèlgika
E duo dinámiko formá “Menasa” i “MC Don T”, próksimamente lo bai ta den Tomorrowland na Bèlgika. E duo aki lo bai marka historia un biaha mas, representando Kòrsou internashonalmente. Tomorrowland ta konsiderá un di e festivalnan di mas grandi na mundu.
TRENDSZ a komprondé ku e festival aki su edishon di aña 2017, a konta ku presensia di alrededor di 300.000 bishitante, kende a bini for di tur huki na mundu.
Pa loke ta aña 2018, e festival aki, ta programá pa tuma lugá riba djasabra dia 28 yüli próksimo.
Tabata aña pasá ku e duo a debutá na Tomorrowland aya na Boom, Bèlgika. Nan a hasi esaki ku hopi éksito, unda esnan presente ku a sigui nan show, a gosa hopi. Tambe ‘Menasa’ ku ‘MC Don T’, a waya e bandera di Kòrsou orguyosamente riba tarima i lógikamente riba tur medio sosial, por a presensiá esaki, ku a nifiká hopi promoshon pa nos isla internashonalmente. E aña aki, e duo ariba menshoná, lo presentá durante ‘prime time’, ku ta nifiká ku mas persona lo presensiá nan show. TRENDSZ a keda informá tambe ku nos ofisina di turismo ‘Curaçao Tourist Board’, ta un di e gran patrosinadònan den e totalidat aki.
“MC Don T.”
MC Don T, su nòmber artístiko a originá for di un nòmber di kariño bieu ku e tabatin ku tabata ‘Telmu’, miéntras ku su eksperensia di bida i loke e ta para p’e, huntu ku pashon pa manehá mundu, ta motibu di e DON, dilanti di e lèter T.
Ku su pashon i tremendo bos, Don T, fásilmente por animá i trese ambiente den tur evento i tambe riba tur ritmo, unda e ta konosí tambe na Oropa, na entre otro Bèlgika, Spaña i Hulanda, den diferente sentro nòkturno.
“Don T” a yega di kompartí esenario, ku entre otro Franky Rizardo, Shemanology, Freddy Moreira, Don James, Afro Bros, Kelly Ross, Thyaz, Dimitri Vegas, Chuckie, Party Squad i tambe Glow in the Dark. Miéntras ku na Kòrsou e ta konosí pa su presentashonnan den entre otro festival Su’Legria, Kokomo Beach, Cabana Beach, UFC, Madero, Fuikdag, Spoonz, Bar 27 i Club Vanilla.
“Menasa”
DJ Menasa ta konosí ya pa basta aña, unda primeramente e tabata karga e nòmber di “DJ Menace”. Pronunsiamentu malu di su nòmber, a pone ku esaki a bin kambia.
Ta trata di DJ, kende no mester di ningun introdukshon na Kòrsou. E la inisiá su karera, ku e grupo Immorales, pa seguidamente bai riba su mes i a produsí diferente hit, ku hopi artista konosí den e gremio Urban a uza. Ta trata aki di entre otro Basic One, Brian Dekkers, Enmeris, Mosta Man, Da Ridlaz i Area 51.
Pa loke ta produkshonnan ku e tabata parti di dje, tin ‘Muñeca’, ‘El Caballo’ i ‘Nochi Pa Club’, di Immorales, ‘Balor’ di Brian Dekkers i tambe ‘Bala’, ku “Tony Montana Music”. ‘Menasa’ tabatin su promé Holland tour, na mart último, unda e la hasi presentashonnan na Hulanda i Alemania. Miéntras ku ta trata aki di DJ, kende a toka tambe ku DJ Moortje, Yung Felix (Barong Family), Ghetto Flow i Freddy Morreira entre otro. Aktualmente e ta trahando riba su promé EP.
