Decoded ta introdusí Lopez Montana
Kere tur e rumornan! E kas di produkshon Decoded e aña aki ku mas enfoke internashonal ta introdusi e kantante Lopez Montana; un kantante dominikano konosí den e género musikal urban. Siman pasá e kas di produkshon a lansa e kansion ‘Cero Sentimientos’ di Lopez Montana feat. Bauco, esaki primeramente pa Latinoamérika ku un kampaña publisitario dirigí pa públiko latino riba plataformanan di Youtube, iTune, Spotify, Tidal i Apple Music. E siman aki e piesa lo keda distribuí pa islanan ABC i region di Caribe.
E piesa ‘Cero Sentimientos’, un ‘trap’ produsí pa Pastor di kual ya por mira e videoclip riba e kanal di Youtube di Decoded. E piesa mes ta papia di un damita sensual ku ta kapta interes di e kabayero, pero sin ke drenta den muchu detaye ta preferá pa tin un ‘relashon’ pashoná, pero ku sero sentimentu. Lopez Montana no ta e promé kantante di Rep. Dominikana ku Decoded ta firma- Enmeris ku ketu bai ta gosando di popularidat na Kòrsou, awó ta mas enfoká riba merkado Latino. E trayekto deliniá pa Decoded ya kaba ta dunando su resultadonan, konsiderando ku Enmeris su ‘Dame un Call’ feat. Melymel tin riba 2.5 mion views riba e Youtube. E siguiente proyekto ta e introdukshon den Latinoamérika di Bauco, ku próksimamente lo tin su propio single titulá ‘Llámame’. Tur artista di Decoded por wòrdu siguí riba e Youtube Channel @decodedofficial. Por stream riba ITunes, Spotify, Tidal i Apple Music tambe.
Tokante Lopez Montana
E kantante di 26 aña, nasé na San Francisco de Macoris na Rep. Dominicana a mustra interes pa músika for di su edat hóben. Ku 11 aña ya kaba e’la kuminsa komponé; esaki mes tabata motivashon pa e realisá su soño di un dia por ta un kantante i risibí rekonosementu rònt mundu. Nunka e’la pèrdè interes den músika, apesar di kontratempu. Biniendo for di un famia humilde i di poko rekurso a siñ’é traha duru i determiná pa alkansá su idealnan.
