Alex Acosta lo kuminsa move ku Orquesta Bermuda
Algun luna atras TRENDSZ, a realisá un entrevista ku e hóben kantante Edilio Alexander Acosta, mihó konosí komo ‘Alex’. Ta trata aki di kantante kende den pasando a yega di militá, den un di a agrupashonnan musikal mas grandi den reino Hulandes, ku ta Cache Royale. E momentu ei Alex a duna di konosé, ku el a tuma un pouze for di farándula, pa dediká mas tempu na su estudio. Tambe e la splika ku muy pronto e lo ta aktivo bèk den farándula lokal, unda ku inkluso tabata tin algun oferta riba mesa.
Awe TRENDSZ ta kompartí ku bo, di a risibí e informashon ku e kantante, a skohé pa djòin e famia di Orquesta Bermuda. Ta trata aki di un agrupashon musikal na Hulanda.
Orquesta Bermuda ta un agrupashon musikal di artistanan yu di Kòrsou residensiá na Hulanda. Nan ta músikonan hóben, ku hopi talento i gana di logra hopi pa futuro i sigur den músika. E front di e banda ta formá pa Damiana Wallé, Virgel Doran, Cliftenjohn Martines i Edilio Alexander Acosta.
Mas aleu TRENDSZ por informá tambe ku Aldrin Schoobaar, èks trompetista di entre otro Champagne Forever i Cache Royale/Deluxe ta trompetista nobo i alabes Roadmanager di e agrupashon musikal Bermuda.
E banda aki lo toka e.o género músikal karibense, latino i tambe zouk. Na luna di ougùstùs próksimo, Bermuda, lo lansa su promé piesa promoshonal, ku lo ta kompañá na mes momentu tambe pa su videoclip. TRENDSZ, ta deseá nan tur klase di éksito i ta spera di tende hopi mas di Bermuda.
